अहिल्यानगर |प्रतिनिधी| Ahilyanagar
शहरातील पत्रकार सुशील थोरात व त्यांच्या मुलावर प्राणघातक हल्ला करून पसार झालेल्या तिघांना स्थानिक गुन्हे शाखेच्या पथकाने छत्रपती संभाजीनगर परिसरातून ताब्यात घेतले. हेमंत उर्फ सोनु दत्तात्रय कोहक (वय 27, रा. बोल्हेगाव), महेश उर्फ पप्पु दशरथ मते (वय 27, रा. पाईपलाईन रोड, सावेडी) आणि प्रशांत शिवाजी निक्रड (वय 25, रा. तागडवस्ती, सावेडी) अशी ताब्यात घेतलेल्या संशयित आरोपींची नावे आहेत.
20 ऑगस्ट रोजी थोरात यांच्या कारला सोनु कोहक याने त्याच्या दुचाकीने धडक दिली. या कारणावरून तसेच थोरात यांनी संशयितांच्या विरोधात बातम्या प्रसिध्द केल्याच्या रागातून वाद झाला. त्यानंतर सोनु कोहक, पप्पु मते, विकी ढवण, प्रशांत निक्रड व एका अनोळखी इसमाने थोरात व त्यांच्या मुलास मारहाण केली होती. पोलीस अधीक्षक मुम्मका सुदर्शन यांनी स्थानिक गुन्हे शाखेला आरोपींचा तातडीने शोध घेण्याचे आदेश दिले. त्यानुसार निरीक्षक संतोष मुटकुळे यांनी दोन स्वतंत्र पथके तयार केली. उपनिरीक्षक विकास जाधव, संदीप दरवडे तसेच पोलीस अंमलदार संदीप पवार, योगेश भिंगारदिवे, अतुल लोटके, शाहीद शेख, राहुल व्दारके, फुरकान शेख, विजय ठोंबरे, सुनील मालणकर, भगवान थोरात व प्रशांत राठोड यांच्या पथकांनी आरोपींचा समांतर तपास सुरू केला.
तपासादरम्यान बातमीदारांकडून मिळालेली माहिती, सीसीटीव्ही फुटेज आणि तांत्रिक विश्लेषणाच्या आधारे आरोपींचा माग काढण्यात आला. 24 ऑगस्ट रोजी हेमंत कोहक हा त्याच्या साथीदारांसह छत्रपती संभाजीनगर येथील वाळुंज एमआयडीसी परिसरात असल्याची माहिती पोलिसांना मिळाली. या माहितीच्या आधारे स्थानिक गुन्हे शाखेच्या पथकाने सापळा रचून तिघांना ताब्यात घेतले. त्यांच्याकडे चौकशी केली असता त्यांनी पत्रकार थोरात व त्यांच्या मुलास मारहाण केल्याची माहिती दिल्याचे पोलिसांनी सांगितले. दरम्यान, हेमंत कोहक व प्रशांत निक्रड हे सराईत गुन्हेगार असल्याचे पोलिसांनी नमूद केले आहे.
