बंगळुरू । Bangalore
दक्षिण भारताचे प्रवेशद्वार मानल्या जाणाऱ्या कर्नाटकच्या राजकारणात पुन्हा एकदा कमालीचे सत्तानाट्य रंगात आले असून, गेल्या काही दिवसांपासून पडद्यामागे सुरू असलेल्या राजकीय हालचाली आता निर्णायक टप्प्यावर पोहोचल्याचे दिसत आहे. मुख्यमंत्री सिद्धरामय्या यांच्या राजीनाम्याच्या चर्चांनी अचानक वेग घेतला असतानाच, उपमुख्यमंत्री डी. के. शिवकुमार यांच्या गळ्यात मुख्यमंत्रीपदाची माळ पडणार असल्याची शक्यता राजकीय वर्तुळात वर्तवली जात आहे. मात्र, या सत्तांतराच्या नाट्यात केवळ मुख्यमंत्री बदलणार नसून, राज्यातील जातीय आणि प्रादेशिक समीकरणे साधण्यासाठी तब्बल चार नवे उपमुख्यमंत्री नेमण्याचा एक नवा ‘मास्टर प्लॅन’ काँग्रेस हायकमांडने तयार केल्याची खात्रीलायक माहिती सूत्रांनी दिली आहे.
कर्नाटकमध्ये पक्षांतर्गत मोठा कलह टाळण्यासाठी आणि आगामी निवडणुका डोळ्यांसमोर ठेवून काँग्रेस सर्वसमावेशक सोशल इंजिनिअरिंगचा वापर करण्याच्या तयारीत असल्याचे समजते. या नव्या फॉर्म्युल्यानुसार दलित, ओबीसी, लिंगायत आणि अल्पसंख्याक अशा चार प्रमुख घटकांमधून प्रत्येकी एका प्रभावी नेत्याला उपमुख्यमंत्रीपद दिले जाऊ शकते. सध्या दलित गटातून जी. परमेश्वरा आणि प्रियांक खर्गे, तर ओबीसी गटातून थेट मुख्यमंत्री सिद्धरामय्या यांचे पुत्र यतींद्र सिद्धरामय्या यांचे नाव आघाडीवर आहे. तसेच लिंगायत समाजातून एम. बी. पाटील आणि ईश्वर खांद्रे, तर अल्पसंख्याक गटातून के. जे. जॉर्ज, यू. टी. खादर आणि जमीर अहमद खान यांच्या नावांची जोरदार चर्चा सुरू आहे.
या संपूर्ण घडामोडींच्या पार्श्वभूमीवर, गुरुवारी बंगळुरूमधील ‘कावेरी’ या सरकारी निवासस्थानी मुख्यमंत्री सिद्धरामय्या आणि डी. के. शिवकुमार यांच्यात होणाऱ्या हाय-व्होल्टेज ‘ब्रेकफास्ट मिटिंग’कडे सर्वांचे डोळे लागले आहेत. या महत्त्वपूर्ण बैठकीनंतर दोन्ही नेते संयुक्त पत्रकार परिषद घेऊन राज्यातील नेतृत्व बदलाबाबतची आपली अधिकृत भूमिका स्पष्ट करू शकतात, अशी शक्यता आहे. विशेष म्हणजे, डिसेंबर २०२५ मध्येही या दोन्ही नेत्यांमध्ये अशीच ‘ब्रेकफास्ट डिप्लोमसी’ पाहायला मिळाली होती, ज्याद्वारे काँग्रेसने पक्षांतर्गत एकजुटीचा संदेश दिला होता. मात्र, आता परिस्थिती बदलली असून अंतर्गत चर्चांना मोठे उधाण आले आहे.
दिल्लीतील सूत्रांनी दिलेल्या माहितीनुसार, काँग्रेस नेते राहुल गांधी यांनी सिद्धरामय्या यांना मुख्यमंत्रीपद सोडण्याचा सल्ला दिला असून डी. के. शिवकुमार यांच्याकडे राज्याची धुरा सोपवण्याची तयारी पूर्ण झाली आहे. या बदल्यात सिद्धरामय्या यांना राष्ट्रीय राजकारणात मोठी व मानाची भूमिका दिली जाईल, तसेच त्यांचे पुत्र यतींद्र सिद्धरामय्या यांना उपमुख्यमंत्री करून त्यांचे राजकीय पुनर्वसन केले जाईल, असा प्रस्ताव सध्या हायकमांडकडून चर्चेत ठेवण्यात आला आहे.
या मोठ्या बदलाची औपचारिक घोषणा करण्यापूर्वी सिद्धरामय्या हे आपल्या मंत्रिमंडळातील सहकारी आणि आमदारांसोबत एक विशेष ‘डिनर बैठक’ घेऊन त्यांना विश्वासात घेणार असल्याचे समजते. काँग्रेसचे वरिष्ठ नेते के. सी. वेणुगोपाल आणि कर्नाटक प्रभारी रणदीप सिंग सुरजेवाला यांच्या उपस्थितीत या मोठ्या निर्णयावर शिक्कामोर्तब होऊ शकते. दुसरीकडे, डी. के. शिवकुमार यांच्या समर्थकांनी त्यांना भावी मुख्यमंत्री म्हणून शुभेच्छा देणारे पोस्टर्स आणि सोशल मीडिया पोस्ट्स आत्तापासूनच व्हायरल करण्यास सुरुवात केली आहे. पक्षाकडून अद्याप कोणतीही अधिकृत घोषणा करण्यात आली नसली, तरी कर्नाटकातील ही राजकीय उलथापालथ कोणत्या वळणावर थांबते, याकडे संपूर्ण देशाचे लक्ष लागले आहे.
