पंचवटी | प्रतिनिधी Panchavati
पंचवटी परिसरातील स्वामीनारायण पोलीस चौकीसमोरील महामार्गावर भरधाव लक्झरी बसने दुचाकीला पाठीमागून जोरदार धडक दिल्याने दोन तरुणांचा मृत्यू झाल्याची दुर्दैवी घटना बुधवारी पहाटे घडली. अपघातानंतर बस चालक वाहनासह घटनास्थळावरून पसार झाला असून पंचवटी पोलिसांनी त्याच्याविरुद्ध गुन्हा दाखल करून शोधमोहीम सुरू केली आहे.
पोलिसांकडून मिळालेल्या माहितीनुसार, यज्ञराज काशीराम पांडे (वय २७, रा. पाथर्डी फाटा) आणि आयुष राजेंद्र कासार (वय २०, रा. चेहेडी, नाशिक रोड) हे दुचाकीवरून जात असताना हा अपघात झाला. पहाटे सुमारे २.२५ वाजता स्वामीनारायण पोलीस चौकीसमोरील हायवेवर ‘हंसचाल’ कंपनीची एसी स्लीपर लक्झरी बस (AR 11 L 9002) भरधाव वेगाने जात होती. बस चालकाने वाहनावरील नियंत्रण न राखता पुढे असलेल्या टीव्हीएस स्टार सिटी दुचाकीला (MH 18 AE 6356) पाठीमागून जोरदार धडक दिली.
या धडकेत दुचाकीवरील दोन्ही तरुण गंभीर जखमी होऊन रस्त्यावर फेकले गेले. त्यांना तातडीने उपचारासाठी रुग्णालयात दाखल करण्यात आले; मात्र उपचार सुरू असताना दोघांचाही मृत्यू झाला. अपघातानंतर चालकाने जखमींना मदत न करता घटनास्थळावरून पलायन केल्याचे पोलिस तपासात समोर आले आहे.
या प्रकरणी चेतन जगदीश भामरे (वय २२, रा. पाथर्डी फाटा) यांनी दिलेल्या फिर्यादीवरून पंचवटी पोलीस ठाण्यात अज्ञात बस चालकाविरुद्ध निष्काळजीपणे वाहन चालवून मृत्यूस कारणीभूत ठरल्याप्रकरणी गुन्हा दाखल करण्यात आला आहे. या घटनेचा पुढील तपास उपनिरीक्षक प्रकाश नेमाणे करीत आहेत.
