पुणे | Pune
महाराष्ट्र राज्य माध्यमिक व उच्च माध्यमिक शिक्षण मंडळाच्या दहावी आणि बारावीच्या विद्यार्थ्यांसाठी महत्त्वाची बातमी आहे. फेब्रुवारी-मार्च २०२७ मध्ये होणाऱ्या दहावी आणि बारावीच्या परीक्षांचे अंतिम वेळापत्रक जाहीर करण्यात आले आहे. महाराष्ट्र राज्य माध्यमिक व उच्च माध्यमिक शिक्षण मंडळाच्या पुणे, नागपूर, छ.संभाजीनगर, मुंबई, कोल्हापूर, अमरावती, नाशिक, लातूर व कोकण या 9 विभागीय मंडळामार्फत फेब्रुवारी-मार्च 2027 मध्ये आयोजित करण्यात येणाऱ्या उच्च माध्यमिक प्रमाणपत्र (इ.12वी) व माध्यमिक शालान्त प्रमाणपत्र (इ.10वी) लेखी व प्रात्यक्षिक परीक्षा खालील कालावधीत आयोजित करण्यात येणार आहेत.
बारावीची लेखी परीक्षा ६ फेब्रुवारी ते १८ मार्च या कालावधीत, तर दहावीची लेखी परीक्षा १५ फेब्रुवारी ते १५ मार्चदरम्यान होणार आहे. प्रात्यक्षिक, तोंडी, श्रेणी आणि अंतर्गत मूल्यमापनाच्या परीक्षांचे वेळापत्रकही जाहीर झाले आहे. विषयनिहाय सविस्तर वेळापत्रक ६ डिसेंबरपासून मंडळाच्या संकेतस्थळावर उपलब्ध होणार असल्याची माहिती राज्य मंडळाचे सचिव डॉ. दीपक माळी यांनी दिली.
बारावीची परीक्षा ६ फेब्रुवारीपासून; १८ मार्चपर्यंत चालणार
राज्य मंडळाने जाहीर केलेल्या वेळापत्रकानुसार बारावीच्या विद्यार्थ्यांची लेखी परीक्षा ६ फेब्रुवारी २०२७ पासून सुरू होणार आहे. ही परीक्षा १८ मार्च २०२७ पर्यंत चालणार आहे. विज्ञान, वाणिज्य आणि कला शाखांसह विविध व्यावसायिक अभ्यासक्रमांच्या विद्यार्थ्यांना या वेळापत्रकानुसार परीक्षेचे नियोजन करता येणार आहे. बारावीच्या विद्यार्थ्यांच्या प्रात्यक्षिक, तोंडी, श्रेणी आणि अंतर्गत मूल्यमापनाच्या परीक्षा २० जानेवारी ते ६ फेब्रुवारी २०२७ या कालावधीत होणार आहेत. त्यामुळे विद्यार्थ्यांना लेखी परीक्षेपूर्वी प्रात्यक्षिक परीक्षांची तयारीही पूर्ण करावी लागणार आहे.
दहावीची लेखी परीक्षा १५ फेब्रुवारीपासून
दहावीच्या विद्यार्थ्यांची लेखी परीक्षा १५ फेब्रुवारी २०२७ रोजी सुरू होणार असून १५ मार्च २०२७ पर्यंत चालणार आहे. दहावीच्या विद्यार्थ्यांच्या प्रात्यक्षिक, तोंडी, श्रेणी आणि अंतर्गत मूल्यमापनाच्या परीक्षा २८ जानेवारी ते १३ फेब्रुवारी या कालावधीत आयोजित करण्यात येणार आहेत. परीक्षेच्या तारखा जाहीर झाल्यामुळे विद्यार्थ्यांना अभ्यासाचे नियोजन, उजळणी आणि सराव परीक्षांचे वेळापत्रक तयार करणे सोपे होणार आहे.
विषयनिहाय वेळापत्रक ६ डिसेंबरपासून उपलब्ध
राज्य मंडळाने परीक्षांचा कालावधी जाहीर केला असला, तरी प्रत्येक विषयाचा पेपर नेमका कोणत्या दिवशी आणि कोणत्या सत्रात होणार, याची सविस्तर माहिती विषयनिहाय वेळापत्रकातून मिळणार आहे. हे सविस्तर वेळापत्रक ६ डिसेंबर २०२६ पासून मंडळाच्या अधिकृत संकेतस्थळावर उपलब्ध करून देण्यात येणार आहे.
विद्यार्थ्यांनी अधिकृत वेळापत्रक पाहूनच आपल्या अभ्यासाचे नियोजन करावे. सोशल मीडिया किंवा इतर अनधिकृत संकेतस्थळांवर प्रसारित होणाऱ्या वेळापत्रकांवर अवलंबून राहू नये, असे आवाहन मंडळाकडून करण्यात आले आहे.
