मथुरा । Mathura
उत्तर प्रदेशातील मथुरा जिल्ह्यातून एक अत्यंत हृदयद्रावक घटना समोर आली आहे. भाविकांनी भरलेली एक बोट यमुना नदीत पांटून पुलाला धडकल्याने मोठा अपघात झाला. या दुर्घटनेत ९ भाविकांचा पाण्यात बुडून मृत्यू झाला असून, २२ जणांना सुरक्षित बाहेर काढण्यात यश आले आहे. मृतांमध्ये पंजाबमधील भाविकांचा समावेश असल्याचे समोर आले आहे.
मिळालेल्या माहितीनुसार, पंजाब येथील भाविकांचा एक गट मथुरा येथे दर्शनासाठी आला होता. हे सर्व भाविक यमुना नदीतून बोटीने प्रवास करत वृंदावन येथील प्रसिद्ध देवराहा बाबा मठाकडे जात होते. ज्या ठिकाणी ही दुर्घटना घडली, तिथे पांटून पुलाच्या दुरुस्तीचे काम सुरू होते. नदीचा प्रवाह आणि तांत्रिक कारणामुळे बोट चालकाचे बोटीवरील नियंत्रण सुटले आणि वेगवान बोट थेट पुलाच्या खांबाला जाऊन धडकली. धडक इतकी भीषण होती की, काही क्षणांतच बोट उलटली आणि सर्व प्रवासी पाण्यात फेकले गेले.
अपघात घडताच स्थानिक मच्छिमार आणि नागरिकांनी मदतीसाठी धाव घेतली. घटनेची माहिती मिळताच स्थानिक पोलीस, अग्निशमन दल आणि प्रशासकीय अधिकारी तातडीने घटनास्थळी पोहोचले. तातडीने बचावकार्य (Rescue Operation) सुरू करण्यात आले. अग्निशमन दलाच्या जवानांनी आणि स्थानिक मच्छिमारांच्या मदतीने २२ प्रवाशांना सुखरूप पाण्यातून बाहेर काढले. मात्र, दुर्दैवाने ९ जणांचा जागीच मृत्यू झाला.
मथुरा ग्रामीण पोलीस दलाचे एसपी सुरेश चंद रावत यांनी दिलेल्या माहितीनुसार, सध्या घटनास्थळी मदतकार्यासाठी एनडीआरएफ (NDRF) आणि एसडीआरएफ (SDRF) च्या तुकड्या तैनात करण्यात आल्या आहेत. जखमी भाविकांना तातडीने जवळच्या शासकीय रुग्णालयात उपचारासाठी दाखल करण्यात आले असून, त्यांच्यावर तज्ज्ञ डॉक्टरांच्या देखरेखीखाली उपचार सुरू आहेत.
उत्तर प्रदेशचे मुख्यमंत्री योगी आदित्यनाथ यांनी या भीषण अपघाताबद्दल तीव्र शोक व्यक्त केला आहे. त्यांनी जिल्हा प्रशासनाला तातडीने पीडितांना सर्वतोपरी मदत करण्याचे आदेश दिले आहेत. मुख्यमंत्र्यांनी मृतांच्या नातेवाईकांप्रति संवेदना व्यक्त करतानाच, मृतांच्या वारसांना आर्थिक मदत देण्याची घोषणा केली आहे. तसेच, जखमींना योग्य उपचार मिळतील याची खात्री करण्याचे निर्देशही प्रशासनाला दिले आहेत. या घटनेमुळे मथुरा आणि वृंदावन परिसरात हळहळ व्यक्त केली जात आहे. नदीपात्रात पुलाचे काम सुरू असताना बोटींच्या वाहतुकीबाबत योग्य काळजी घेतली होती का, याची चौकशी आता पोलीस करत आहेत. सध्या बचावकार्य पूर्ण झाले असून मृतांची ओळख पटवण्याचे काम सुरू आहे.
