नाशिक | प्रतिनिधी | Nashik
जिल्ह्यातील ११ नगरपरिषदांच्या निवडणुकीसाठी दि.२ आणि २० डिसेंबर अशा दोन टप्प्यात मतदान प्रक्रिया पार पडली. नगराध्यक्षपदाच्या ११ जागांसाठी एकूण ५३ तर नगरसेवकपदाच्या २६४ जागांसाठी एक हजाराहून अधिक उमेदवार रिंगणात आहेत. जिल्ह्यात एकूण ६५.९४ टक्के मतदान झाले होते. यामध्ये त्र्यंबकेश्वर नगरपरिषदेत सर्वाधिक म्हणजे जवळपास ८५ टक्के मतदान झाले होते. त्यानंतर आज (दि.२१) रोजी मतमोजणी पार पडत असून, जिल्ह्यात महायुतीने मुसंडी मारली आहे.
त्र्यंबकेश्वर आगामी सिंहस्थ मेळा डोळ्यासमोर ठेवून शहराचे प्रथम नागरिकपद आपल्याकडेच कसे राहील, यासाठी भाजप, राष्ट्रवादी, शिवसेना आणि काँग्रेसने पूर्णता प्रतिष्ठा पणाला लावली होती. नगराध्यक्षपदासाठी पाच पक्षीय उमेदवारांसह आठ उमेदवार रिंगणात होते. त्यामुळे येथे तिरंगी लढत होण्याची शक्यता वर्तविण्यात येत होती. पंरतु, येथे दुरंगी लढत झाल्याचे बघायला मिळाले.
नगराध्यक्षपदी शिंदे सेनेच्या त्रिवेणी तुंगार-सोनवणे विजयी झाल्या असून, भाजपचे कैलास घुले यांचा तब्बल १८०० मतांनी दारुण पराभव झाला आहे. तर याठिकाणी राष्ट्रवादी अजित पवार गटाचे आठ, भाजपचे सहा आणि शिंदेंच्या शिवसेनेचे सहा नगरसेवक निवडून आले आहेत .
