नाशिक | प्रतिनिधी | Nashik
तुमचे नाव मनी लॉन्ड्रिंग प्रकरणात आले असून, तुम्हाला अटक होऊ शकते, अशी भीती दाखवत सायबर भामट्यांनी एका नागरिकाची तब्बल ५९ लाख ५८ हजार रुपयांची ऑनलाइन फसवणूक केल्याचा प्रकार उघडकीस आला आहे. या प्रकरणी सायबर पोलीस ठाण्यात गुन्हा दाखल करण्यात आला.
पोलिसांनी दिलेल्या माहितीनुसार, फिर्यादी यांना ११ जुलै २०२६ रोजी दुपारी १२ वाजल्यापासून ते २२ जुलै २०२६ रोजी सायंकाळी ७ वाजेपर्यंत अज्ञात व्यक्तींनी व्हॉट्सअॅपवरून सातत्याने व्हॉइस कॉल, व्हिडिओ कॉल आणि चॅटद्वारे संपर्क साधला. संबंधितांनी स्वतःला मुंबई पोलीस अधिकारी असल्याचे भासवून फिर्यादींचे नाव मनी लॉन्ड्रिंग प्रकरणात आल्याचा दावा केला.
दरम्यान, अटकेची भीती दाखवून फिर्यादींकडून टप्प्याटप्प्याने ५९ लाख ५८ हजार रुपये वेगवेगळ्या बँक खात्यांवर वर्ग करून घेण्यात आले. आपली फसवणूक झाल्याचे लक्षात येताच फिर्यादींनी पोलिसांत तक्रार दिली.
