नवापूर – Navapur – श.प्र. :
तालुक्यातील जामतलाव येथे वनविभागाने एका घरातून ताज्या तोडीचे सागवानी लाकूड तसेच रंधा मशिन, वाहनांसह इतर सुमारे 12 लाखाचा मुद्देमाल जप्त केला आहे. याप्रकरणी एकाविरुद्ध वनगुन्हयाची नोंद करण्यात आली आहे.
याबाबत अधिक माहिती अशी की, आज रोजी सकाळी 10.30 वाजेच्या सुमारास वनरक्षक बोरझर यांच्याकडील प्रथम रिपोर्टनुसार फरार वाहन अवैध मुद्देमाल तसेच रंधा मशिन मशिन जप्तबाबत व आरोपी इसम परेश सुरेश गावीत रा.जामतलाव यास अटक करण्यासाठी जामतलाव येथे शासकीय वाहनाने सहाय्यक वनसंरक्षक (प्रादेशिक व वन्यजीव) नंदुरबार यांच्यासमवेत नंदुरबार वनविभागामधील वनक्षेत्र नवापूर चिंचपाडा, खांडबारा, शहादा, नंदुरबार, काकडदा, मोबाईल स्कॉड शहादा, तसेच धुळे वनविभाग मधील वनक्षेत्र कोंडाईबारी, पिंपळनेर मधील सर्व वनक्षेत्रपाल, वनपाल व वनरक्षक यांच्यासह जामतलाव येथे जाऊन आरोपीच्या घराची व परिसराची झडती घेतली असता आरोपी फरार होता.
मात्र घरात रंधा मशिन, डिझाईन मशिन, पाया उतार मशिन, डिझेल इंजिन मशिन व ताज्या तोडीचे साग चौपाट नग सहा मिळाले. तसेच घराच्या दोन्ही बाजूस फरार असलेले टीयुव्ही 300 लाल रंगाची महिंद्रा कंपनीचे वाहन क्रमांक (एमएच 39 जे 8772) व टाटासुमो पांढर्‍या रंगाची क्रमांक जीजे 16 डब्ल्यू 3938 ही वाहने आढळून आली.
सदर वाहन मुद्देमाल व यंत्र सामुग्रीसह नवापूर येथील पोलीस निरीक्षक राजपूत व त्यांच्या स्टाफच्या मदतीने जप्त करून क्रेन मशिन च्या सहाय्याने व शासकीय वाहनाच्या साहाय्याने वहातूक करून शासकीय विक्री आगार नवापूर येथे वनपाल आगार यांच्या ताब्यात जमा करण्यात आले.
सदर जप्त वाहन व मुद्देमालाची किंमत अंदाजे 12 लक्ष आहे. याबाबत वनक्षेत्रपाल नवापूर यांनी त्यांच्याकडील अहवालानुसार आरोपींविरुद्ध वनगुन्ह्याची नोंद केली आहे.
सदर कारवाई सहाय्यक वनसंरक्षक (प्रादेशिक व वन्यजीव) नंदुरबार तसेच पोलीस विभाग नवापूर तसेच नंदुरबार वनविभाग व धुळे वनविभाग येथील वनक्षेत्रपाल, वनपाल व वनरक्षक तसेच मोबाईल स्कॉड शहादा यांनी केली.
पुढील कारवाई वनसंरक्षक धुळे वनवृत्त धुळे, उपवनसंरक्षक नंदुरबार वनविभाग शहादा, विभागीय वनाधिकारी दक्षता पथक, धुळे व सहाय्यक वनसंरक्षक (प्रादेशिक व वन्यजीव) नंदुरबार यांच्या मार्गदर्शनाखाली वनक्षेत्रपाल नवापूर व रेंज स्टाफ नवापूर करित आहे.
