मुंबई | Mumbai
लोकसभा निवडणुकीत (Loksabha Election) महायुतीला (Mahayuti) बसलेल्या झटक्यानंतर राज्यातील विधानसभा निवडणुकीच्या आधी मुख्यमंत्री माझी लाडकी बहीण योजना राज्य सरकारने लागू केली. या योजनेच्या परिणामी महायुतीला लाडक्या बहि‍णींनी भरभरून मतदान केले. विधानसभा निवडणुकीच्या प्रचारात महायुतीने लाडक्या बहिणींना २१०० रुपये देण्याचे आश्वासन दिले होते. मात्र, महायुतीचे सरकार पुन्हा सत्तेत आल्यानंतर लाडक्या बहिणींना २१०० रुपये देण्याच्या संदर्भात अद्याप कोणताही निर्णय झालेला नाही.
राज्याची आर्थिक परिस्थिती बघता सरकारचे हे आश्वासन अधांतरात असल्याचे दिसत आहे. अशातच आता राज्याचे मंत्री आणि राष्ट्रवादी काँग्रेस (अजित पवार) पक्षाचे नेते नरहरी झिरवाळ (Narhari Zirwal) यांनी २१०० रुपयांबाबत मोठे विधान केले आहे. झिरवाळ हे जळगावच्या दौऱ्यावर असताना त्यांनी माध्यमांशी संवाद साधताना विविध मुद्यांवर भाष्य केले. यावेळी त्यांना लाडकी बहीण योजनेतील पात्र महिलांना २१०० रुपये कधी मिळणार?असा प्रश्न विचारण्यात आला. त्यावर झिरवाळ यांनी उत्तर देत मोठे विधान केले आहे.
यावेळी ते म्हणाले की, “लाडक्या बहिणी नाराज आहेत, हे आपण सांगत असता किंवा विरोधक सांगत असतात. पण सर्व बाजूंनी लाडक्या बहिणी खूश आहेत. लाडक्या बहिणींना (Ladki Bahin) २१०० रुपये देण्याचे कोणीही जाहीर केलेले नाही”, असं मंत्री नरहरी झिरवाळ यांनी म्हटले आहे. झिरवाळ यांनी केलेल्या विधानावरून त्यांनी २१०० रुपयांवरून पलटी मारल्याचे दिसून येत आहे.
तसेच झिरवाळ यांनी विरोधकांवर टीका करताना म्हटले की, “यापूर्वी विरोधक असा दावा करत होते की सरकार १५०० रुपये देखील देणार नाही. मात्र, सरकारने १५०० रुपये दिल्यावर विरोधक आता २१०० रुपयांचा मुद्दा उचलून धरत आहे. माझ्या मते १५०० रुपयांची रक्कमही पुरेशी आहे आणि अनेक महिलाही (Women) मिळालेल्या मदतीबद्दल आनंदी आहेत”, असा दावाही त्यांनी केला.
लाडक्या बहीणींना एप्रिलचा हप्ता कधी मिळणार?
एप्रिल महिना संपत आला तरी अद्याप लाडक्या बहीणींना या महिन्याचा हप्ता मिळालेला नाही. त्याबाबत आता राज्याच्या महिला व बालविकास मंत्री आदिती तटकरे (Aaditi Tatkare) यांनी माहिती दिली आहे. त्या म्हणाल्या की, “मुख्यमंत्री माझी लाडकी बहीण योजनेचा एप्रिल महिन्याचा हप्ता महिना संपायच्या अगोदर प्राप्त होईल. तसेच मुख्यमंत्री माझी लाडकी बहीण योजनेत कोणताही बदल करण्यात आलेला नाही. ज्या महिलांच्या कुटुंबाचे उत्पन्न अडीच लाखांपेक्षा कमी असेल त्यांनाच पहिल्यापासून निधी दिला जातो. तर नमो शेतकरी योजनेतून ज्या महिलांना एक हजार रुपये मिळतात, त्यांना ५०० रुपये मिळतील हे योजनेचे दोन शासन निर्णय होते त्यामध्येच निश्चित करण्यात आले होते”, असे देखील त्यांनी म्हटले.
