शिर्डी |प्रतिनिधी| Shirdi
जागतिक ख्यातीचे श्रद्धास्थान असलेल्या शिर्डीतील श्री साईबाबांच्या दरबारी शनिवारी रात्री रिलायन्स फाउंडेशनच्या अध्यक्षा नीता मुकेश अंबानी (Nita Ambani) यांनी साईबाबांच्या समाधीचे दर्शन घेतले.
श्रीमती नीता अंबानी यांचे शनिवारी रात्री शिर्डीत आगमन झाले. त्यानंतर त्यांनी थेट श्री साईबाबांच्या समाधी मंदिरात जाऊन समाधीचे दर्शन (Sai Baba Darshan) घेतले. यावेळी त्यांनी साईबाबांच्या चरणी माथा टेकवून प्रार्थना केली. रात्रीच्या शांत आणि भक्तिमय वातावरणात झालेल्या या दर्शनावेळी श्रीमती अंबानी यांनी काही वेळ मंदिरात थांबून साईबाबांचे आशीर्वाद घेतले. दर्शनानंतर श्री साईबाबा संस्थानच्या वतीने श्रीमती नीता अंबानी यांचा विशेष सत्कार करण्यात आला.
संस्थानचे मुख्य कार्यकारी अधिकारी गोरक्ष गाडीलकर यांनी त्यांना शाल, श्रीफळ आणि श्री साईबाबांची प्रतिमा देऊन सन्मानित केले. साईबाबांची ओढ आम्हाला नेहमीच शिर्डीला (Shirdi) घेऊन येते, येथे येऊन मनाला मोठी शांती मिळते, अशा भावना याप्रसंगी व्यक्त करण्यात आल्या. यावेळी रिलायन्स समूहाचे काही अधिकारी आणि साईबाबा संस्थानचे वरिष्ठ कर्मचारी उपस्थित होते. श्रीमती अंबानी यांच्या सुरक्षेसाठी मंदिर परिसरात कडक बंदोबस्त तैनात करण्यात आला होता.
