लासलगाव | Lasalgoan
येथील बाजार समितीमध्ये ऐन सणासुदीच्या तोंडावर कांद्याचा दर मोठ्या प्रमाणात घसरला.
अवघ्या दोन दिवसांत तब्बल १३५१ रुपयांनी दर घसरल्याने शेतकरी अडचणीत सापडला आहे. सोमवारी सरासरी ४६५१ रुपये प्रति क्विंटलने विक्री झालेला कांदा आज अचानक सरासरी ३३०० रुपये प्रति क्विंटलने विक्री झाला. शेतकऱ्यांना दोन दिवसात तब्बल १३५१ रुपये प्रति क्विंटलचा फटका बसला आहे.
गुरुवार १२ नोव्हेंबरपासून लासलगाव बाजार समितीला दिपावलीनिमित्त आठ दिवस सुट्या असल्याने बाजार समितीत कांदा आवक वाढलेली आहे. तब्बल दोन महिन्यानंतर पहिल्यांदाच मुख्य बाजार आवारावर मंगळवारी बारा हजार क्विंटलच्या पुढे कांदा लिलावासाठी आला होता.
परदेशी आयात केलेला कांदा, उन्हाळ कांदा तसेच नवीन लाल कांद्याची आवक मोठ्या प्रमाणात झाली आहे.
यामुळे लासलगाव बाजार समितीत दोन दिवसात १३५१ रुपयाने कांदा गडगडल्याने बाजारभावात मोठी घसरण झाली आहे. सणासुदीच्या काळात कांद्याच्या बाजारभावात मोठ्या प्रमाणात घसरण होत असल्याने झालेला खर्च कसा काढावा असा प्रश्न आता कांदा उत्पादकांसमोर उभा राहिला आहे. वेगवेगळ्या निर्बंधांमुळे कांद्याच्या बाजारभावात घसरण होत असल्याने शेतकरी चिंतग्रस्त झाला आहे.
सकाळच्या सत्रात येथील बाजार समितीत ४९० वाहनातून ७५०० क्विंटल कांद्याची आवक झाली होती. त्याला कमाल ४४७१ रुपये, सर्वसाधारण ३३०० रुपये तर किमान १२०० रुपये इतका प्रतिक्विंटलला बाजार भाव जाहित झाला, तर लाल कांद्याला किमान १०००,सरासरी २२०० तर जास्तीत जास्त ३९०० रुपये प्रति क्विंटल भाव मिळाला.
