नाशिक | प्रतिनिधी

अंबड येथील वावरे नगर परिसरात अल्पवयीन मुलीस वेश्याव्यवसाय करण्यास भाग पाडून पैसे कमवणार्‍या आई-वडलांना अवैध धंदे विरोधी पथकाने जेरबंद केले. त्यांच्या विरोधात अनैतिक व्यापार प्रतिबंध कायद्यासह पोक्सो गुन्हा दाखल करण्यात आला आहे. वावरे नगर येथे एका अल्पवयीन मुलीची सावत्र आई व वडिलांनी व्यवसाय करून घेत असल्याची तक्रार पोलीस आयुक्तालयास मिळाली. आयुक्तांच्या आदेशाने अवैध व्यवसाय विरोधी पथकाचे सहायक पोलीस निरीक्षक कुंदन सोनोने, सहायक पोलीस उपनिरीक्षक विजय शिरसाठ, पोलीस नाईक सारंग वाघ, पोलीस शिपाई गजानन पवार, सूरज गवळी आणि संतोष वाघ यांच्या पथकाने सोमवारी (दि.23) सापळा रचला.

या दाम्पत्याकडे तोतया गिर्‍हाइक पाठवून तक्रारीची शहानिशा केली. दाम्पत्य अल्पवयीन मुलीकडून वेश्याव्यवसाय करण्यास जबरदस्ती करत असल्याचे यात आढळून आल्याने पथकाने धाड टाकत पीडितेच्या आई-वडिलांना ताब्यात घेतले. त्यांच्यावर अंबड पोलीस ठाण्यात अनैतिक व्यापार प्रतिबंध कायद्यासह पोक्सो गुन्हा दाखल करण्यात आला आहे. पीडित मुलीने परजिल्ह्यात सातवीपर्यंत शिक्षण घेतले आहे.

चालक असलेल्या पित्यासह ती नाशिकला राहण्यास आली, मात्र तिच्या सावत्र आईने व पित्याने पीडितेला वेश्या व्यवसायात ढकलले. तीच्या वरील अत्याचार पाहुन जागृक नागरीकाने पोलीस आयुक्तालयास ही माहिती दिली. यानंतर ही कारवाई करण्यात आली. अटक करण्यात आलेल्या दाम्पत्याकडे 16 मोबाइल, सीडी, दुचाकी, 13 हजार 950 रुपये रोख व इतर साहित्य असा 92 हजार 70 रुपयांचा मुद्देमाल जप्त करण्यात आला. या प्रकरणी दोघांना अटक करण्यात आली आहे.

नाशिक | प्रतिनिधी

मोकळ्या जागेत जुगार खेळणार्‍या व खेळवणार्‍या 6 जुगार्‍यांना मंगळवारी (दि. २४) दुपारी अवैध धंदे विरोधी विशेष पथकाने ताब्यात घेतले आहे. जेलरोड शिवारातील पाण्याच्या टाकी जवळील मच्छी मार्केटजवळ ही कारवाई करण्यात आली.

या प्रकरणी जागा मालक विलास पवार (रा. जेलरोड) याच्यासह इतर पाच जणांविरोधात नाशिकरोड पोलीस ठाण्यात गुन्हा दाखल करण्यात आला आहे. जेलरोड परिसरात मोकळ्या जागेत जुगार अड्डा सुरु असल्याची माहिती अवैध धंदे कारवाई पथकास मिळाली.

त्यानुसार पथकाचे सहायक पोलीस निरीक्षक कुंदन सोनोने यांनी मंगळवारी दुपारी ही कारवाई केली. त्यात संशयित सुरेश देवराम कुवर (61, जेलरोड), देविदास राधाकिसन पगारे (34, दोघे रा. जेलरोड) हे जुगार्‍यांकडून मटका खेळवून घेत असल्याचे आढळले.

यात पोलिसांनी इतर तीन जुगार्‍यांना ताब्यात घेतले आहे. या संशयितांकडून 1 लाख 12 हजार 624 रुपयांचा मुद्देमाल जप्त करण्यात आला आहे. या जुगार्‍यांविरोधात नाशिकरोड पोलीस ठाण्यात गुन्हा दाखल करण्यात आला आहे.

नाशिक | प्रतिनिधी

व्हेक टेक रंगराजन येथे सोसायटी ऑफ ऑटोमोबाईल इंजिनियर्स (एसएई इंडिया) च्या दक्षिण विभागाने आपले बारावे एडब्ल्यूआयएम राष्ट्रीय ऑलिम्पिक स्पर्धा आयोजित केली होती. या स्पर्धेत नाशिक येथील सरस्वती गुलाबराव पाटील विद्यालयाच्या प्रकल्पाला द्वितीय क्रमांक मिळाला आहे. येथील विद्यार्थ्यांनी जेट टॉयवर आधारित  प्रकल्प सादर केला होता.

नुकतीच चेन्नईतील सगुंतला आर अँड डी इंस्टिट्यूट ऑफ सायन्स अँड टेक्नॉलॉजीमध्ये दोन वर्षाच्या राष्ट्रीय कार्यक्रम आखण्यात आला आहे. या कार्यक्रमाची यंदाची थीम ‘शेपिंग फ्यूचर मोबिलिटी’ अशी होती.

नाशिकच्या विद्यार्थ्यांनी नाविन्यपूर्ण कामगिरी करत अनोखी खेळणी तयार करून सर्वांचेच लक्ष वेधून घेतले.  या  कार्यक्रमात विद्यार्थ्यांना स्किमर, जेट टॉय, स्ट्रॉ रॉकेट आणि यासारख्या खेळणी तयार करण्यासाठी विद्यार्थ्यांना कच्चा माल असलेली किट देण्यात आली होती.

एसएई इंटरनॅशनलने हा अभ्यासक्रम घेतला होता. तसेच हि संस्था देशभरातील शाळांमध्ये हा उपक्रम राबवित आहे. मॉडेल वाहने तयार करून डिझाइन करून अभियंता अभियांत्रिकीमधील तरुणांना प्रोत्साहित करणे हा या कार्यक्रमाचा मुख्य उद्देश आहे.

यावर्षी या कार्यक्रमात एकूण ८४ संघ होते. यात एकूण ३३२ विद्यार्थी, १७८ स्वयंसेवक आणि ४० वेगवेगळ्या प्रदेशातील शिक्षकांचा सहभाग होता.

या कार्यक्रमात जेट टॉय आणि स्किमर संघांना १५ हून अधिक प्रकारांचे पुरस्कार प्रदान करण्यात आले. स्कायम्मर येथे राष्ट्रीय ऑलिम्पिक २०१९ चे एकूणच विजेते वाना वाणी मॅट्रिक उच्च माध्यमिक विद्यालय, तर नाशिक येथील सरस्वती गुलाबराव पाटील विद्यालयास द्वितीय क्रमांक मिळाला.

या विद्यालयास जेट टॉयसाठी दुसरा क्रमांक देण्यात आला. या व्यतिरिक्त, वेल टेक यांनी ‘शेपिंग फ्यूचर मोबिलिटी’ या थीमवर नॅशनल बेस्ट प्रेझेंटेशनचे पाच विशेष बक्षीसेदेखील वितरीत केले. या कार्यक्रमात यावर्षी सातव्या इयत्तेतील विद्यार्थ्यांसाठी ग्लाइडर चॅलेंज ही एक नवीन स्पर्धादेखील सुरू झाली.

pic credit : https://www.autocarpro.in/

नाशिक । प्रतिनिधी

महिला सुरक्षेसाठी शहर पोलिसांनी राबवलेल्या विशेष मोहीम, ऑलआऊट ऑपरेशनमध्ये विविध ठिकाणी महिलांची छेडखानी करण्याचा प्रयत्न करणार्‍या विकृतांना साध्या वेशातील महिला पोलिसांनी सापळा रचून जेरबंद केले.

कमलकुमार गिरधरलाल खेमानी (52, रा. चेतननानगर, इंदिरानगर), आशिष लक्ष्मीचंद अग्रहरी (30), अक्षी अमीर इस्माईल आत्रम (45, रा. दोघेही पंचवटी), हेमंत शिवाजी वाघ (33, रा. पारिजातनगर), भरत अभिमन पाटील (एकदंतनगर), गणेश परशुराम वरुडे (31, रा. दत्तमंदिर, नवीन नाशिक) अशी जेरबंद करण्यात आलेल्या संशयितांची नावे आहेत.

आमच्या नियमित अपडेट होत असलेल्या बातम्या आपल्या मोबाईलमध्ये मिळविण्यासाठी इथे क्लिक करा

हैदराबाद येथील घटनेच्या पार्श्वभूमीवर पोलीस आयुक्त विश्वास नांगरे-पाटील यांच्या पुढाकाराने नाशिकमधील प्रामुख्याने उशिरा कामावरून परतणार्‍या महिलांच्या सुरक्षेसाठी ही मोहीम राबवण्यात आली. यामध्ये महिला पोलीस सेवकांनी साध्या वेशात ठराविक ठिकाणी उभे राहिल्यानंतर त्यांची छेड काढणार्‍यांना पोलिसांनी जेरबंद केले. शहरात विविध भागात अशा सहा जणांना अटक करण्यात आली.

कामावरून घरी परतणार्‍या महिलांचा एकटेपणा, कमजोरीचा रात्रीच्या काळोखाचा गैरफायदा घेत त्यांच्यावर अत्याचार केले जातात. हे रोखण्यासाठी शहर पोलिसांनी सोमवारी मध्यरात्री 12 ते पहाटे 5 वाजेपर्यंत शहरातील विविध ठिकाणी साध्या वेशातील महिला सेवकांनी स्टिंग ऑपरेशन केले.

यामध्ये महिला पोलीस साध्या वेशात बसची वाट पाहत थांबल्या. पथकातील पुरुष दूर अंतरावर साध्या वेशात उभे राहिले. तसेच काही आजूबाजूला गस्त घालत होते. या महिलेची छेड काढण्याचा कोणी प्रयत्न केला असता त्याचे व्हिडीओ शूटिंग करून त्यांना जेरबंद करण्यात आले.

(फाईल फोटो)

सिन्नर : तालुक्यातील उजनी येथे शेतीच्या वादातून दोन कुटुंबात हाणामारी झाल्याची घटना घडली आहे. यामध्ये एकाचा मृत्यू झाला असून चार जण गंभीर जखमी झाले आहेत.

दरम्यान अधिक माहिती अशी कि, सिन्नर तालुक्यातील उजनी येथे दोन कुटुंबात वादावादी झाली. याचे रूपांतर हाणामारीत होऊन यामध्ये एक जण गंभीर जखमी झाला. यावेळी त्याचा रुग्णालयात नेण्यापूर्वीच मृत्यू झाला. तर अन्य चौघे गंभीर जखमी आहेत.

या प्रकरणी एमआयडीसी सिन्नर पोलीस ठाण्यात गुन्हा दाखल करण्यात आला आहे.