मुंबई । Mumbai
संभाजी ब्रिगेडचे प्रदेशाध्यक्ष प्रवीण गायकवाड यांच्यावर रविवारी अक्कलकोट येथे शिवर्धम प्रतिष्ठानच्या कार्यकर्त्यांनी हल्ला केल्याची घटना घडली होती. या प्रकरणात प्रवीण गायकवाड यांनी बुधवारी पत्रकार परिषद घेऊन भाजपचे माजी प्रदेशाध्यक्ष चंद्रशेखर बावनकुळे यांच्यावर गंभीर आरोप केले. या हल्ल्यामागे बावनकुळे हेच मास्टरमाईंड असल्याचा दावा त्यांनी केला आहे. तसेच, शिवर्धम प्रतिष्ठानचा प्रमुख दीपक काटे याला बावनकुळे आणि उपमुख्यमंत्री देवेंद्र फडणवीस यांचे राजकीय पाठबळ असल्याचे गायकवाड यांनी सांगितले.
गायकवाड यांनी पत्रकार परिषदेत सांगितले की, दीपक काटे याला राजकीय संरक्षण देण्याचे काम बावनकुळे यांनी केले. एका जाहीर सभेत बावनकुळे यांनी, “दीपक, तुझ्यामागे मी आणि देवेंद्र फडणवीस आहोत,” असे सांगितल्याचा व्हिडीओ पुरावा म्हणून गायकवाड यांनी सादर केला. या व्हिडीओत बावनकुळे यांनी काटे याला पाठिंबा देताना, “मागील सरकारने तुला गुन्हेगार ठरवले, पण मला तुझा अभिमान आहे. आता काम कर, आम्ही तुझ्या पाठीशी आहोत,” असे म्हटल्याचे दिसते. गायकवाड यांनी हा व्हिडीओ दाखवून बावनकुळे यांच्यावर गंभीर टीका केली.
गायकवाड यांनी पुढे सांगितले की, दीपक काटे याच्यावर मकोका कायद्यांतर्गत कारवाई होणे अपेक्षित होते, परंतु अक्कलकोटमधील तपास अधिकारी ढाकणे हा बावनकुळे यांचा नातेवाईक असल्याने काटेला जामीन मिळवून देण्यासाठी विशेष योजना आखली गेली. “एखाद्या गुन्हेगाराला जामीन मिळवून देऊन सामाजिक कार्यकर्त्यांवर हल्ले घडवून आणणे, हा भाजप आणि राष्ट्रीय स्वयंसेवक संघाचा डाव आहे,” असा आरोप गायकवाड यांनी केला. त्यांनी यासंदर्भात शाहू महाराज, डॉ. बाबासाहेब आंबेडकर, महात्मा फुले आणि महात्मा गांधी यांच्या हत्यांचा उल्लेख करत भाजप आणि संघावर टीकास्त्र सोडले.
गायकवाड यांनी असा दावा केला की, दीपक काटे याच्यासारख्या गंभीर गुन्ह्याची नोंद असलेल्या व्यक्तीला भाजपने युवा मोर्चाचे सरचिटणीसपद दिले आहे. “शस्त्रास्त्र कायद्याप्रमाणे काटेला जामीन मिळणे शक्य नव्हते, तरीही त्याला जामीन मिळाला. यामागे बावनकुळे यांचा हात आहे,” असे गायकवाड यांनी ठामपणे सांगितले. त्यांनी पुढे म्हटले की, संघाच्या बैठकीत बहुजन संघटना संपवण्याची रणनीती आखली गेली असून, त्याचाच भाग म्हणून काटेला विशिष्ट जबाबदारी देण्यात आली आहे.
संभाजी ब्रिगेडच्या फुले-शाहू-आंबेडकरी विचारधारेला भाजप धोकादायक मानते, असे सांगत गायकवाड यांनी हा हल्ला सरकारपुरस्कृत असल्याचा आरोप केला. “मुख्यमंत्री देवेंद्र फडणवीस आणि चंद्रशेखर बावनकुळे यांनी विधानसभेत यासंदर्भात खोटी माहिती दिली,” असेही त्यांनी नमूद केले. गायकवाड यांनी या हल्ल्यामागील सत्य बाहेर आणण्यासाठी आणि दोषींवर कठोर कारवाई करण्याची मागणी केली आहे.
या पत्रकार परिषदेत दाखवलेल्या व्हिडीओ पुराव्यांमुळे हे प्रकरण अधिक गंभीर बनले आहे. दीपक काटे आणि बावनकुळे यांच्यातील संबंध आणि या हल्ल्यामागील राजकीय षडयंत्र याबाबत आता अधिक तपासाची आवश्यकता आहे. या घटनेमुळे राजकीय वर्तुळात खळबळ उडाली असून, येत्या काळात यासंदर्भात आणखी खुलासे होण्याची शक्यता आहे.
