पुणे । Pune
पुण्यातून धक्कादायक घटना समोर आली आहे. भारतीय जनता पक्षाचे विधानपरिषदेचे आमदार योगेश टिळेकर (Yogesh Tilekar) यांचे मामा सतीश वाघ (Satish Wagh Murder) यांचे अपहरण करून खून करण्यात आला आहे.
सतीश वाघ यांचे काल सोमवारी पहाटे अपहरण करण्यात आले होते. मॉर्निंग वॉकसाठी निघालेल्या सतीश वाघ यांना चौघांनी जबरदस्तीने एका गाडीत बसवले आणि अपहरण केले होते. हडपसर पोलीस ठाण्यात याप्रकरणी अज्ञात आरोपीविरुद्ध गुन्हा दाखल करण्यात आला होता. पुणे पोलीस आरोपींचा शोध घेत होते. मात्र काल सायंकाळी यवत पोलीस स्टेशनच्या हद्दीत सतीश वाघ यांचा मृतदेह सापडला.
सतीश वाघ हे सोमवारी सकाळी मॉर्निंग वॉक करत होते. त्यावेळी एका कारमधून आलेल्या काही लोकांनी त्यांना जबरदस्ती गाडीत बसवलं. तेव्हा कारमध्ये त्यांना कोंबत असताना वाघ ‘वाचवा वाचवा’ असं ओरडले, त्याचवेळी रस्त्याने जाणाऱ्या एका नागरिकाने मागे फिरून पाहिलं. त्या व्यक्तीने कारचा पाठलागही केला. मात्र, कार वेगाने सोलापूर रस्त्याच्या दिशेने गेली.
सतीश वाघ यांचं अपहरण करुन त्यांना कारमधून घेऊन गेल्याचं काही प्रत्यक्षदर्शींनी पाहिलं होतं. त्यानंतर प्रत्यक्षदर्शी नागरिकांनी तात्काळ सतीश वाघ त्यांच्या घरी जाऊन झालेला प्रकार सांगितला. ही घटना सोमवारी सकाळी ६ वाजून १५ मिनिटाच्या सुमारास फुरसुंगी फाटा येथील ब्ल्यू-बेरी हॉटेल समोर घडली. प्रत्यक्षदर्शी नागरिकांनी वाघ यांच्या घरी त्यांना कारमधून कोणी घेऊन गेल्याचं सांगितल्यानंतर या प्रकरणी सतीश वाघ यांच्या मुलाने हडपसर पोलिसांत तक्रार दाखल केली. त्यानंतर हडपसर पोलिसांनी चार अनोळखी व्यक्तींवर अपहरणाचा गुन्हा दाखल केला होता.
दरम्यान सोमवारी अज्ञातांनी अपहरण करून खून करण्यात आल्याचे पुणे शहर पोलिसांनी माहिती दिली. मांजरी येथील फुरसुंगी फाट्याजवळ संध्याकाळी फिरण्यासाठी बाहेर आलेल्या काही लोकांना मृतदेह दिसल्यानं मोठी खळबळ उडाली होती. त्यांच्या मृतदेहाजवळ लाकडी दांडका आढळुन आला असून सकाळी अपहरण केल्यानंतर लगेचच त्यांची हत्या केली असल्याचे दिसत आहे.
पोलिसांनी दिलेल्या अधिक माहितीनुसार,संध्याकाळी फिरण्यासाठी आलेल्या काही लोकांना हा मृतदेह दिसला. त्यानंतर लगेचच त्यांनी यवत पोलीस स्टेशनला याबाबत माहिती दिली. सोमवारी पहाटे अपहरण करण्यात आलेल्या सतिश वाघ यांचा मृतदेह शिंदवणे घाटात सापडला. पोलीस वाघ यांचा मृतदेह शिंदवणे घाटातून ससुन रुग्णालयात घेऊन गेले आहेत.
