पुणे (प्रतिनिधी) – पुणे शहरात करोनामुळे सर्वाधिक मृत्यू ससून रुग्णालयात झाले असून, त्यासाठी रुग्णालयाचा निष्काळजीपणा कारणीभूत आहे. या पार्श्वभूमीवर करोनाचा संसर्ग वाढत असल्याने ससून रुग्णालयाच्या प्रमुखांवर कारवाई करावी, अशी मागणी शहर काँग्रेसने मुख्यमंत्री उद्धव ठाकरे यांच्याकडे केली आहे.
महापालिकेतील काँग्रेसचे गटनेते अरविंद शिंदे यांनी मुख्यमंत्र्यांना पत्र पाठवले असून, त्यात ससून रुग्णालयाच्या प्रमुखांवर कारवाई करण्याची मागणी केली आहे. करोनामुळे ससून रुग्णालयात एका व्यक्तीचा मृत्यू झाल्यानंतर मृतदेहाची विल्हेवाट लावताना निष्काळजीपणा करण्यात आला आहे. या व्यक्तीला करोनाची बाधा झाल्याचा अहवालाही उशिरा देण्यात आला. त्यामुळे तो रुग्ण राहत असलेल्या परिसरात करोनाचा संसर्ग वाढला असल्याचा आरोपही शिंदे यांनी केला आहे.
लॉकडाउन झाल्यानंतरही ससून रुग्णालय सरकारच्या निर्देशानुसार कारवाई करत नसून, सातत्याने गंभीर चुका करण्यात येत आहेत. रुग्णालयांर्तगत तसेच बी. जे. वैद्यकीय महाविद्यालयाच्या विविध विभाग प्रमुखांमध्येही मोठ्या प्रमाणात नाराजी असून, अशा आपत्कालीन परिस्थितीत ससूनचे प्रमुख संयमीपणाने कामे करत नाहीत. त्याचा फटका रुग्णांना बसत असल्याचा आरोप शिंदे यांनी केला आहे.
