Tuesday, November 10, 2026
Homeमहाराष्ट्रखड्ड्यांचा आणखी एक बळी, मुंबई नाशिक महामार्गावर TDRF च्या जवानाचा मृत्यू

खड्ड्यांचा आणखी एक बळी, मुंबई नाशिक महामार्गावर TDRF च्या जवानाचा मृत्यू

मुंबई । Mumbai

काही दिवसांपूर्वीच भिवंडीतील चार मजली इमारत कोसळली तेव्हा ढिगाऱ्याखालून कित्येक नागरिकांना सुखरूप बाहेर काढून त्यांचे प्राण वाचवणारे ठाणे आपत्ती प्रतिसाद दलाचे (TDRF) जवान विकास गोरे यांनी दाखवलेले शौर्य प्रत्येकाच्या स्मरणात आहे. मात्र, काळजाचा ठोका चुकवणारी शोकांतिका म्हणजे, संकटाच्या मुखातून लोकांना सहीसलामत बाहेर काढणाऱ्या या शूर जवानाचा बळी प्रशासकीय दुर्लक्षामुळे पडलेल्या एका खड्ड्याने घेतला आहे. सोमवार, ३ ऑगस्ट रोजी झालेल्या या भीषण आणि दुर्दैवी अपघातामुळे संपूर्ण ठाणे जिल्ह्यात शोककळा पसरली असून नागरिकांमधून प्रशासनाच्या अनास्थेविरुद्ध प्रचंड संताप व्यक्त केला जात आहे.

- Advertisement -

मिळालेल्या माहितीनुसार, जवान विकास गोरे हे आपल्या बुलेट दुचाकीवरून कामावर जात असताना शहापूर तालुक्यातील भारंगी नदी परिसरातील रस्त्यावरून जात होते. रस्त्यावर पडलेल्या एका मोठ्या आणि धोकादायक खड्ड्याचा अंदाज न आल्याने त्यांच्या दुचाकीचा तोल गेला. दुचाकी जोरात खड्ड्यात आदळल्याने गोरे हे रस्त्यालगतच्या सुरक्षा भिंतीवर गंभीरपणे आदळले. या भीषण अपघातात त्यांच्या डोक्याला आणि शरीराला गंभीर दुखापती झाल्या होत्या. त्यांना तातडीने रुग्णालयात दाखल करण्यात आले; मात्र उपचारादरम्यान त्यांची प्राणज्योत मालवली.

रस्त्यांवरील हे ‘मृत्यूचे सापळे’ एवढ्यावरच थांबलेले नाहीत. भिवंडी-ठाणे मार्गावरील राहनाळ येथे खड्ड्यामुळेच आणखी एका महिलेला आपला जीव गमवावा लागला आहे. सुनीता पाल (वय ४६) या आपल्या पतीसोबत दुचाकीवरून परतत असताना काँक्रीट रस्त्यावरील खड्ड्यामुळे त्यांची गाडी घसरली. पती अक्षयलाल हे रस्त्याच्या कडेला फेकले गेले, तर सुनीता या दुर्दैवाने रस्त्याच्या मध्यभागी पडल्या. त्याच क्षणी मागून येणाऱ्या भरधाव ट्रकने त्यांना चिरडले, ज्यामुळे त्यांचा जागीच मृत्यू झाला. या अपघातात त्यांचे पती गंभीर जखमी झाले असून त्यांच्यावर उपचार सुरू आहेत. याप्रकरणी नारपोली पोलीस पुढील तपास करत आहेत.

अवघ्या काही तासांतच खड्ड्यांमुळे दोन निरपराध नागरिकांचे बळी गेल्यानंतर राज्यभरातून हळहळ व्यक्त होत आहे. “जीव वाचवणाऱ्या रक्षकाचाच अशा रस्ते अपघातात मृत्यू व्हावा, यापेक्षा मोठे दुर्दैव ते काय?” असा संतप्त सवाल नागरिक विचारत आहेत. निष्काळजी अधिकाऱ्यांवर तातडीने मनुष्यवधाचे गुन्हे दाखल करावेत आणि रस्त्यांची तातडीने डागडुजी करावी, अशी तीव्र मागणी आता जोर धरू लागली आहे.

ताज्या बातम्या

आगीच्या

लक्ष्मीपूजनाच्या दिवशी नाशिककरांवर अग्नितांडवाचे सावट; दिवसभरात तब्बल ‘इतक्या’ आगीच्या घटना

0
नाशिक | प्रतिनिधीआनंद आणि रोषणाईचा सण असलेल्या लक्ष्मीपूजनाच्या दिवशी नाशिककरांवर अग्नितांडवाचे सावट पाहायला मिळाले. फटाक्यांची आतषबाजी आणि रोषणाईच्या आनंदात शहरात दिवसभरात तब्बल ३९ ते...