नाशिक | Nashik
गेल्या काही दिवसांपासून नाशिक महापालिकेचे आयुक्त (Commissioner of Nashik Municipal Corporation) डॉ. अशोक करंजकर (Dr. Ashok Karanjkar) यांची बदली होणार असल्याच्या चर्चा शहरात जोरदार सुरु होत्या. अखेर दोन दिवसांपूर्वी यावर शिक्कामोर्तब झाले. नाशिक महापालिकेच्या (Nashik NMC) आयुक्तपदी डॉ. अशोक करंजकर यांच्या जागी वर्ध्याचे जिल्हाधिकारी राहुल कर्डिले (Rahul kardile) यांची नियुक्ती करण्यात आली. मात्र, कर्डिले यांच्या नियुक्तीवरून भाजपचा एक बडा मंत्री नाराज झाल्याची चर्चा आहे. त्यांच्या नाराजीमुळे कर्डिले यांच्या आयुक्तपदावरील नियुक्तीला मुख्यमंत्री देवेंद्र फडणवीस यांनी तोंडी तात्पुरती स्थगिती दिल्याची चर्चा राजकीय वर्तुळात सुरु आहे.
आगामी सिंहस्थ कुंभमेळ्यासाठी मुख्यमंत्री देवेंद्र फडणवीस (CM Devendra Fadnavis) यांनी थेट आयएएस असलेल्या राहुल कर्डिले यांची नियुक्ती केली. यामुळे भाजपचे हे बडे मंत्री आपल्या मर्जीतील अधिकाऱ्यासाठी रुसून बसल्याची चर्चा आहे. त्यामुळे मुख्यमंत्र्यांनी या मंत्र्यांची मर्जी सांभाळण्याचा निर्णय घेतल्यास नाशिक महानगर विकास प्राधिकरणाच्या मुख्य कार्यकारी अधिकारी मनीषा खत्री यांच्याकडे महापालिकेचा तात्पुरता पदभार जाण्याची शक्यता आहे. दरम्यान कर्डिले यांची नियुक्ती होण्याआधी नाशिक महापालिकेचे आयुक्त डॉ.अशोक करंजकर हे (दि.३१ डिसेंबर २०२४) पर्यंत वैद्यकीय रजेवर असल्यामुळे शासनाने आयुक्तपदाचा प्रभारी पदभार एनएमआरडीच्या आयुक्त असलेल्या मनीषा खत्री (Manisha Khatri) यांच्याकडे सोपविण्यात आल्याची ऑर्डर काढली होती. मात्र, त्यानंतर काही तासांतच राहुल कर्डिले यांची आयुक्तपदी नियुक्ती करण्यात आली होती.
गेल्या सहा वर्षांत नाशिक महापालिकेला (Nashik NMC) तीन वर्षे कार्यकाळ पूर्ण करणारा एकही आयुक्त मिळालेला नाही. त्यामुळे त्याचा थेट परिणाम नाशिकच्या विकासावर झाला आहे. डॉ. अशोक करंजकर यांनीही राजकारण्यांच्या हस्तक्षेपामुळे पालिकेच्या कारभारातून अंग काढून घेतले. त्यात दोन निवडणुकांचा आचारसंहितेमुळे आणि पालिकेतील प्रशासकीय राजवटीमुळे कारभार पूर्णपणे भरकटला आहे. त्यामुळे नाशिकसाठी थेट आणि नव्या दमाचा आयएएस अधिकारी द्यावा अधिक मागणी भाजपच्या आमदारांनी केली होती. त्यामुळे महायुती सरकार येताच मुख्यमंत्री फडणवीस यांनी राजकीय हस्तक्षेप झुगारून वर्ध्याचे जिल्हाधिकारी कर्डिले यांच्याकडे नाशिक आयुक्तपदाची धुरा सोपवली. मात्र, आता कर्डिले यांच्या नियुक्तीवरून भाजपचा बडा मंत्री नाराज असल्याची चर्चा आहे.
दरम्यान, नाशिकच्या पालकमंत्रीपदासाठी शिवसेनेचे मंत्री दादा भुसे आणि राष्ट्रवादीचे मंत्री माणिकराव कोकाटे यांच्यात रस्सीखेच सुरु असताना आता भाजपचे हे बडे मंत्री नाशिकच्या पालकमंत्रिपदासाठी देखील इच्छुक आहेत. आगामी सिंहस्थासाठी नाशिकवरील आपली कमांड अधिक मजबूत करण्यासाठी त्यांना आपल्या मर्जीतील अधिकारी हवा असल्याची चर्चा आहे. मात्र, देवेंद्र फडणवीस यांनी कर्डिले यांची नियुक्ती केल्याने हे मंत्री महोदय नाराज असल्याचे बोलले जात आहे. त्यामुळे नाशिक महापालिकेचे नवीन आयुक्त राहुल कर्डिले यांच्या नियुक्तीला ब्रेक लागणार असल्याचे समजते.
