मुंबई | प्रतिनिधी Mumbai
इटलीत आयोजित करण्यात आलेल्या ‘मॅकफ्रूट’ प्रदर्शनाला उपस्थित राहण्यासाठी कृषी मंत्री माणिकराव कोकाटे यांच्यासह तीन मंत्री उद्या रविवारी इटलीच्या दौऱ्यावर रवाना होणार आहेत.
इटलीतील रोमिनी येथे ‘मॅकफ्रूट -२०२५’ हे जगातील एक प्रमुख आंतरराष्ट्रीय फळे आणि भाजीपाला प्रदर्शन ६ ते ८ मे या काळात आयोजित करण्यात आले आहे. या प्रदर्शनाला माणिकराव कोकाटे यांच्यासह पणनमंत्री जयकुमार रावल आणि कृषी राज्यमंत्री आशिष जयस्वाल हे भेट देणार आहेत. या तिन्ही मंत्र्यांचा दौरा ४ ते ९ मे असा आहे.
इटलीच्या दौऱ्याचा खर्च बाळासाहेब ठाकरे कृषी व्यवसाय आणि ग्रामीण परिवर्तन प्रकल्पाअंतर्गत असलेल्या आंतरराष्ट्रीय प्रदर्शनामध्ये सहभागी होण्यासाठी असलेल्या आर्थिक तरतुदीतून भागवण्यात येणार आहे.
या दौऱ्यात भारतीय दुतावास, इटलीतील चेंबर आँफ काँमर्स, आयातदार आणि वितरकांच्या प्रतिनिधींसोबत व्यावसायिक बैठका होणार आहेत.
