नवी दिल्ली |New Delhi
केंद्रीय अर्थमंत्री निर्मला सीतारामन यांनी आज (रविवारी) देशाचा (Budget) अर्थसंकल्प संसदेत सादर केला. या अर्थसंकल्पात शिक्षण, शेतकरी,रोजगार, महागाई, बेरोजगारी यावर भर देण्यात आला आहे. त्यानंतर पंतप्रधान नरेंद्र मोदी यांनी आजचा अर्थसंकल्प हा महिलांच्या शक्तीचे प्रतिबिंब आणि ऐतिहासिक असल्याचे म्हणत देशाला संबोधित केले.
यावेळी ते म्हणाले की, आजचा अर्थसंकल्प हा महिलांच्या शक्तीचे प्रतिबिंब असून, त्यांनी नवव्यांदा अर्थसंकल्प सादर करून एक नवा विक्रम केला आहे. हा अर्थसंकल्प म्हणजे अनेक संधींसाठी महामार्ग असून, युवा शक्तीचा अर्थसंकल्प आहे. यात तरुण विचार आणि तरुण स्वप्ने आहेत. हा बजेट स्वावलंबी भारताला नवे पंख देणारा आहे. आम्ही फक्त सर्वात वेगाने वाढणारी अर्थव्यवस्था असण्यावर समाधानी नाही. उलट, आम्हाला लवकरात लवकर तिसरी सर्वात मोठी अर्थव्यवस्था बनायचे आहे. आजचा अर्थसंकल्प सध्याच्या स्वप्नांना साकार करणार असून, भारत ज्या सुधारणा करत आहे त्यांना हा अर्थसंकल्प नवीन चालना देईल, असं पंतप्रधान मोदींनी म्हटले.
पुढे ते म्हणाले, अर्थसंकल्पात पायाभूत सुविधा मजबूत करण्यासाठी अनेक मोठी पावले उचलण्यात आली आहेत. समर्पित फ्रेट कॉरिडॉर, देशभरातील जलमार्गांचा विस्तार हाय-स्पीड रेल्वे कॉरिडॉर, टियर २ आणि टियर ३ शहरांच्या विकासावर विशेष लक्ष केंद्रित करणे आणि शहरांना मजबूत आर्थिक पाया देण्यासाठी हा अर्थसंकल्प आहे. कोणत्याही देशाची सर्वात मोठी संपत्ती म्हणजे त्याचे नागरिक आणि आम्ही यामध्ये गुंतवणूक केली आहे. आमचे प्रयत्न कौशल्ये, प्रमाण आणि शाश्वतता मजबूत करण्यासाठी आहेत. म्युनिसिपल बॉन्ड्सना प्रोत्साहन देणे, ही सर्व पावले विकसित भारताच्या दिशेने प्रवासाला आणखी गती देतील, असेही नरेंद्र मोदी यांनी सांगितले.
तसेच या अर्थसंकल्पात रोजगार निर्मितीला चालना मिळेल. आपल्या देशातील १०० दशलक्षाहून अधिक महिला स्वयं-मदत गटांशी संबंधित आहेत. महिला-नेतृत्वाखालील गटांची व्यवस्था तयार करण्यावर अर्थसंकल्पात लक्ष केंद्रित करण्यात आले आहे. लक्ष्मी प्रत्येक घरात पोहोचावी यासाठी प्रयत्न सुरू आहेत. प्रत्येक जिल्ह्यात मुलींसाठी वसतिगृहे बांधली जातील.केंद्र सरकारने दुग्ध उद्योगालाही प्राधान्य दिले आहे. या अर्थसंकल्पात नारळ, काजू आणि कोको उत्पादक शेतकर्यांना प्राधान्य देण्यात आले आहे. भारत विस्तार अॅपमुळे शेतकऱ्यांना त्यांच्या स्वतःच्या भाषेत माहिती मिळवणे सोपे होईल. याशिवाय दुर्मिळ पृथ्वी कॉरिडॉर, महत्त्वाच्या खनिजांवर, कापडांवर आणि उच्च-तंत्रज्ञानाच्या साधनांच्या निर्मितीवर लक्ष केंद्रित करण्याचा अर्थसंकल्पात प्रयत्न करण्यात आल्याचे पंतप्रधान नरेंद्र मोदी म्हणाले.
