पुणे | Pune
गणेशोत्सवाला अवघे दोन दिवस शिल्लक असताना पुण्यातील ध्वनीप्रदूषण आणि डीजेच्या मुद्द्यावरून सुरू असलेला वाद आणखी पेटला आहे. डीजे आणि कर्णकर्कश ध्वनिक्षेपकांच्या वापराला विरोध करणारे विद्यानंद बापट आता पुन्हा अ‍ॅक्शन मोडमध्ये आले आहेत. गणेशोत्सवाच्या काळात ध्वनीप्रदूषणासंदर्भातील नियमांची प्रभावी अंमलबजावणी व्हावी, या मुद्द्यावरून पुणे प्रशासनाला कायदेशीर नोटीस पाठवण्यात आल्याची माहिती समोर आली आहे.
या प्रकरणामुळे गणेशोत्सवाच्या तोंडावर पुण्यातील डीजे, ध्वनिक्षेपक, ध्वनीमर्यादा आणि प्रशासनाची जबाबदारी हे मुद्दे पुन्हा एकदा ऐरणीवर आले आहेत. विद्यानंद सुहास बापट यांच्या वतीने कायदेतज्ज्ञ अॅड. असीम सरोदे आणि त्यांच्या टीमने संबंधित प्रशासनाला कायदेशीर नोटीस पाठवली आहे. महाराष्ट्राचे पोलीस महासंचालक सदानंद दाते, पुणे पोलीस आयुक्त अमितेश कुमार, पुणे महापालिका आयुक्त आणि महाराष्ट्र प्रदूषण नियंत्रण मंडळाच्या (MPCB) प्रादेशिक अधिकाऱ्यांना ही नोटीस देण्यात आली आहे.
डीजेविरोधातील बापटांची भूमिका आधीपासूनच आक्रमक
विद्यानंद बापट हे गेल्या काही दिवसांपासून पुण्यातील गणेशोत्सवात होणाऱ्या ध्वनीप्रदूषणाविरोधात आक्रमक भूमिका मांडत आहेत. सार्वजनिक गणेशोत्सवात डीजे आणि मोठ्या आवाजातील ध्वनिक्षेपकांचा वापर टाळावा, अशी त्यांची मागणी आहे. मोठ्या आवाजामुळे नागरिकांना होणारा त्रास, तसेच ध्वनी प्रदूषणाचा प्रश्न लक्षात घेऊन उत्सव काळात नियमांची कठोर अंमलबजावणी करण्याची मागणी करण्यात आली आहे. उच्च क्षमतेचे अ‍ॅम्प्लीफायर, DJ आणि लेझर शो वापरण्यावर बंदी घालावी, अशी प्रमुख मागणी नोटिशीत करण्यात आली आहे. या भूमिकेमुळे बापट सोशल मीडियावर मोठ्या प्रमाणात चर्चेत आले. त्यांच्या भूमिकेला विरोधही झाला आणि काही ठिकाणी वादाचे प्रसंगही निर्माण झाले. बापट यांच्यावर हल्ला झाल्याचे वृत्तही यापूर्वी समोर आले होते.
BRICS Summit 2026 : “शेजारधर्म पाळूया”; मोदी-जिनपिंग भेटीआधी चीनचा भारताला मोठा संदेश
गणेशोत्सवाच्या दोन दिवस आधी प्रशासनाला नोटीस
गणेशोत्सव सुरू होण्यास अवघे दोन दिवस बाकी असताना प्रशासनाला कायदेशीर नोटीस पाठवण्यात आल्याने या प्रकरणाला नवे वळण मिळाले आहे. समोर आलेल्या माहितीनुसार, गणेशोत्सवाच्या काळात ध्वनीप्रदूषण रोखण्यासाठी असलेल्या नियमांची अंमलबजावणी प्रशासनाने प्रभावीपणे करावी, या मागणीच्या पार्श्वभूमीवर ही नोटीस देण्यात आली आहे. प्रशासनाने केवळ नियम जाहीर न करता त्यांची प्रत्यक्ष अंमलबजावणी करावी, हा या वादातील प्रमुख मुद्दा आहे.
हवा आणि कचरा प्रदूषण रोखण्यासाठी उपायांची मागणी
उत्सवादरम्यान निर्माण होणाऱ्या कचऱ्यावर नियंत्रण ठेवण्यासाठी प्लास्टिकचा वापर कमी करण्याबरोबरच विविध प्रदूषणकारी वस्तूंवर निर्बंध आणण्याची मागणी करण्यात आली आहे. CO₂ कॉन्फेटी कॅनन, फटाके आणि प्लास्टिक कचऱ्याच्या वापराबाबत कठोर उपाययोजना करण्याची मागणी नोटिशीत करण्यात आली आहे. ध्वनीची पातळी नागरिकांना प्रत्यक्ष दिसावी यासाठी महत्त्वाच्या ठिकाणी रिअल-टाइम डेसिबल डिस्प्ले बसवण्याची सूचनाही करण्यात आली आहे.
उत्सव हवा, पण गोंगाट नको’
पुण्यात गणेशोत्सव हा मोठ्या उत्साहात साजरा केला जातो. ढोल-ताशे, पारंपरिक वाद्ये, मिरवणुका आणि विविध सांस्कृतिक कार्यक्रम हे उत्सवाचे महत्त्वाचे भाग आहेत. मात्र, त्याचवेळी मोठ्या आवाजातील डीजे आणि ध्वनिक्षेपकांमुळे नागरिकांना होणारा त्रास हा स्वतंत्र प्रश्न आहे. याच पार्श्वभूमीवर बापट यांनी ध्वनीप्रदूषणाचा मुद्दा केवळ गणेशोत्सवापुरता मर्यादित न ठेवता सार्वजनिक जीवनातील मोठ्या आवाजाच्या वापराविरोधात व्यापक जनजागृती करण्याची भूमिका मांडली आहे.
तीन दिवसांत उत्तर न दिल्यास कायदेशीर कारवाई
नोटीस पाठवणाऱ्या पक्षाने प्रशासनाने गणेशोत्सव काळातच या मागण्यांवर कारवाई करावी, अशी भूमिका घेतली आहे. नोटीस मिळाल्यानंतर तीन दिवसांत उत्तर न दिल्यास कायदेशीर कारवाई करण्याचा इशारा देण्यात आला आहे. गणेशोत्सवानंतरही प्रशासनाकडून अपेक्षित पावले उचलली गेली नाहीत, तर न्यायालयीन मार्गाचा अवलंब करण्याचे सांगण्यात आले आहे. या भूमिकेमागे उत्सवाला विरोध नसून कायद्याची अंमलबजावणी आणि नागरिकांचे आरोग्य, सुरक्षितता व सार्वजनिक मार्ग मोकळे ठेवणे हा उद्देश असल्याचे नोटीस देणाऱ्या बाजूने स्पष्ट केले आहे.
