शेतात औषध फवारणी करताना ब्लोअरमध्ये अडकून महिलेचा दुर्दैवी अंत

येवला । प्रतिनिधी Yeola

तालुक्यातील कातरणी येथे दुर्दैवी घटनेत माधुरी दीपक सोनवणे (वय ३०) या तरुण महिलेचा दुर्दैवी अंत झाला आहे. माधुरी सोनवणे यांना दोन मुली असून मोठी मुलगी तीन वर्षाची आहे तर दुसरी मुलगी दीड वर्षाची आहे. सदर घटनेने कातरणीसह परिसरात हळहळ व्यक्त केली जात आहे

याबाबत अधिक माहिती अशी की आज ( ७ डिसेंबर ) रोजी दुपारच्या सुमारास शेतातील कांदा पिकाला औषध फवारणी करत असताना औषधाच्या टाकीतील पाणी संपल्याने माधुरी टाकीत पाणी टाकण्यास गेल्या असता ट्रॅक्टरचलीत ब्लोअरमध्ये केस अडकल्याने ती ब्लोअर मशीन मध्ये ओढली जाऊन गंभीर जखमी झाली.

नातेवाईकांनी तिला तात्काळ मनमाड येथे उपचारासाठी दाखल केले मात्र तिची प्रकृती चिंताजनक असल्याने तिला पुढील उपचारासाठी उप जिल्हारुग्णालय येवला येथे दाखल करण्यात आले. तपासणीअंती डॉक्टरांनी तिला मृत घोषित केले.

येवला ग्रामीण रुग्णालयात शवविच्छेदन करण्यात आले असून रात्री उशिरा कातरणी येथे अंत्यसंस्कार करण्यात येणार आहेत. या घटनेने कातरणी गावावर शोककळा पसरली आहे येवला तालुका पोलीस ठाण्यात अकस्मात मृत्यूची नोंद करण्यात आली आहे