Accident : कंटेनरच्या धडकेत दुचाकीस्वाराचा मृत्यू

येवला | प्रतिनिधी Yeola

येथील विंचूर चौफुली परिसरातील आसरा हॉटेलजवळ कंटेनर आणि दुचाकी यांच्यात झालेल्या भीषण अपघातात पिंपळगाव जलाल येथील दुचाकीस्वार वृद्धाचा दुर्दैवी मृत्यू झाला. वसंत संभाजी वाघ (वय ७७, रा. पिंपळगाव जलाल) असे मृत व्यक्तीचे नाव आहे.

गुरुवारी, (दि. ९) दुपारच्या सुमारास वसंत वाघ हे आपल्या टीव्हीएस मोटारसायकल (क्रमांक एमएच १३ बी ४१६३) वरून जात असताना भरधाव वेगाने येणाऱ्या कंटेनरने (क्रमांक – आरजे ३२ जीइ ०९७६) त्यांच्या दुचाकीला जोरदार धडक दिली. या अपघातात वाघ गंभीर जखमी झाले.

घटनेची माहिती मिळताच शहर पोलिस तातडीने घटनास्थळी दाखल झाले. जखमी वाघ यांना उपचारासाठी उपजिल्हा रुग्णालयात दाखल केले असता वैद्यकीय अधिकाऱ्यांनी त्यांना मृत घोषित केले.