लासलगाव | वार्ताहर Lasalgaon
कांद्याचे आगार म्हणून ओळख असलेल्या लासलगाव कृषी उत्पन्न बाजार समितीसह नाशिक जिल्ह्यातील विविध बाजार समित्यांमध्ये लाल कांद्याच्या आवकेत वाढ होत असल्याने कांद्याच्या दरावर दबाव निर्माण झाला आहे. बुधवारच्या तुलनेत आज गुरुवार लाल कांद्याच्या कमाल दरात प्रति क्विंटल ३०० रुपयांची घसरण होऊन दर ५ हजार ७०० रुपयांवरून ५ हजार ४०० रुपयांपर्यंत खाली आले. तर जुन्या उन्हाळ कांद्याच्या कमाल दरात प्रतिक्विंटल १४४ रुपयांची घसरण होऊन दर ४ हजार ५३५ रुपयांवरून ४ हजार ३९१ रुपयांपर्यंत खाली आले आहेत. त्यामुळे कांदा उत्पादक शेतकऱ्यांच्या चिंतेत वाढ झाली आहे.
लासलगाव बाजार समितीमध्ये गुरुवारी लाल कांद्याची २३१ वाहनांमधून ३३६४ क्विंटल आवक झाली. कांद्याला प्रतिक्विंटल कमाल ५ हजार ४०० रुपये, किमान १ हजार ८५२ रुपये, सरासरी ४ हजार ७०० रुपये दर मिळाला. उन्हाळ कांद्याची १४७ वाहनांमधून २१०२क्विंटल आवक झाली. कमाल ४ हजार ३९१ रुपये, किमान १ हजार ५०० सरासरी ४ हजार रुपये प्रति क्विंटल दर मिळाला.
लाल कांद्याची आवक दिवसेंदिवस वाढत असल्याने कांद्याच्या बाजारभावातील चढ-उतारामुळे उत्पादक शेतकरी चिंतेत असून आगामी काळात आवक आणि बाजारभावाकडे शेतकऱ्यांचे लक्ष लागले आहे.




