नाशिक | प्रतिनिधी Nashik
राज्यात शनिवार (दि.२७) पासुन दसऱ्या पर्यंतच्या ६ दिवसात महाराष्ट्रात जोरदार पावसाची शक्यता आहे. जिल्ह्यात शनिवार दि.२७ सप्टेंबर ते १ ऑक्टोबर दरम्यान हलका ते मध्यम स्वरूपाच्या पावसाची शक्यता आहे.शनिवारी घाट क्षेत्रात व जिल्ह्याच्या एक-दोन ठिकाणी येलो अलर्ट देण्यात आला असून मेघगर्जनेसह विजांचा कडकडाट, मुसळधार पाऊस व सोसाट्याचा वारा वाहण्याची शक्यता आहे.
रविवार व सोमवारी जिल्ह्याच्या एक-दोन ठिकाणी ऑरेंज अलर्ट देण्यात आला असून मुसळधार ते अति मुसळधार पाऊस, मेघगर्जनेसह विजांचा कडकडाट व सोसाट्याचा वारा वाहण्याची शक्यता आहे.असा अंदाज महात्मा फुले कृषी विद्यापिठाचे विभागीय कृषी संशोधन केंद्र, इगतपुरी यांनी वर्तविला आहे.
दसऱ्यापर्यंत जोरदार पाऊस
मध्य व वायव्य बंगाल उपसागरादरम्यान झालेल्या हवेच्या कमी दाबामुळे संपूर्ण महाराष्ट्रात शनिवार (दि. २७) पासुन दसऱ्यापर्यंतच्या ६ दिवसात संपूर्ण महाराष्ट्रात जोरदार पावसाची शक्यता निर्माण झाली आहे. त्यात उद्या अतिजोरदार पाऊस मुंबई, ठाणे, रायगड,रत्नागिरी, सिंधुदुर्ग व पुणे, सातारा, कोल्हापूर जिल्ह्याचा घाटमाथा व धाराशिव, लातूर, नांदेड जिल्ह्यात होणार आहे.
रविवार (दि. २८) पासून मंगळवार दि.३० पर्यंत नाशिक, मुंबई,पालघर, ठाणे, रायगड रत्नागिरी सिंधुदुर्ग छ. सं. नगर व पुणे सातारा कोल्हापूर जिल्ह्याचा घाटमाथा भागात पाऊस होणार आहे, असे ज्येष्ठ हवामान तज्ञ माणिकराव खुळे यांनी सांगितले. शुक्रवार दि. ३ ऑक्टोबर पासुन पूर्णतः नव्हे परंतु काहीशी उघडीपीची शक्यता जाणवते, असेही खुळे यांनी सांगितले.
