नाशिक | Nashik
अंधश्रद्धेच्या नावाखाली महिलांवर लैंगिक अत्याचार करणाऱ्या स्वयंघोषित अशोक खरातच्या (Ashok Kharat) नाड्या पोलिसांनी आवळण्यास सुरुवात केली आहे. खरातच्या मालमत्तेचे आकडे मोठे असून, एसायटीने त्याच्या संपत्तीच्या चौकशीचे आदेश दिले आहेत. तसेच ज्या कार्यालयात खरात महिलांचे शोषण करायचा त्या कार्यालयाची एसायटीने झाडाझडती घेत त्याला सील लावले आहे. त्यामुळे विकृत खरातचा पाय आणखी खोलात गेला आहे.
शहरातील कॅनडा कॉर्नर परिसरात (Canda Corner Area) असलेल्या खरातच्या ओकस कार्यालयाची एसआयटीच्या पथकाकडून कसून तपासणी करण्यात आली. यात एसआयटीच्या हाती अनेक कागदपत्रे लागल्याची माहिती मिळत आहे. यानंतर एसआयटीच्या पथकाने त्याचे कार्यालय सील केले. त्यामुळे आता एसआयटीला खरातच्या कार्यालयातून कोणती कागदपत्रे मिळाली आहेत, याची उत्सुकता सर्वांना लागून राहिली आहे.
हे देखील वाचा : Ashok Kharat Crime News : पाप झाकण्यासाठी खरातचा नीच डाव! पीडितेची ढाल करत ऑफिसबॉयला बनवले ‘बळीचा बकरा’
दुसरीकडे अशोक खरातच्या शिवानिका संस्थेचे (Shivanika Sanstha) बँक खाते देखील गोठवण्यात आले आहे. तसेच विशेष तपास पथकाकडून मालमत्तेची माहिती मागविण्यात आली आहे. त्यामुळे खरातच्या कुटुंबियांच्या नावे किती संपत्ती आहेत. किती मालमत्ता, कुठे जमीन, कुठे प्लॉट, फ्लॅट, कार व इतर साधने आहेत याची कुंडलीच बाहेर येणार आहे. याशिवाय त्याची जमीन, घर, दुकानांसह त्याच्या राज्यभरातील मालमत्तेचा नोंदणी विभागाकडून शोध सुरू आहे. या तपासात खरातची कोट्यवधी रुपयांची मालमत्ता उघड होण्याची शक्यता आहे.
