मुंबई । Mumbai
देशातील सर्वात श्रीमंत महानगरपालिका म्हणून ओळखल्या जाणाऱ्या मुंबई महानगरपालिकेचा सन २०२६-२७ या आर्थिक वर्षाचा अर्थसंकल्प आज सादर करण्यात आला. महानगरपालिका आयुक्त तथा प्रशासक भूषण गगराणी यांनी ८० हजार ९५२.५६ कोटी रुपयांचा हा भव्य अर्थसंकल्प स्थायी समितीचे अध्यक्ष प्रभाकर शिंदे यांच्याकडे सुपूर्द केला. यंदाच्या अर्थसंकल्पात ८९.८४ कोटी रुपयांची शिल्लक दाखवण्यात आली असून, मुंबईच्या पायाभूत सुविधा आणि सर्वांगीण विकासासाठी मोठी आर्थिक तरतूद करण्यात आली आहे.
मागील आर्थिक वर्षात मुंबई महापालिकेचा अर्थसंकल्प ७४ हजार ४२७.४१ कोटी रुपये इतका होता. त्या तुलनेत यंदाच्या अर्थसंकल्पात १९.३५ टक्क्यांची लक्षणीय वाढ करण्यात आली आहे. मुंबई शहराचा वाढता विस्तार आणि आगामी प्रकल्पांची निकड लक्षात घेऊन ही वाढ करण्यात आल्याचे समजते. आयुक्त भूषण गगराणी यांनी यावेळी स्पष्ट केले की, महापालिकेने विकासकामांसाठी निधी उपलब्ध करून देतानाच दुसरीकडे प्रशासकीय खर्चात बचत करण्याचे कठोर धोरण अवलंबले आहे. अनावश्यक खर्च टाळून तो पैसा जनहिताच्या कामांसाठी वापरण्यावर प्रशासनाचा भर राहणार आहे.
विशेष म्हणजे, मुंबई महापालिकेत गेल्या साडेतीन वर्षांपासून सुरू असलेले प्रशासक राज संपल्यानंतर प्रथमच लोकप्रतिनिधींच्या उपस्थितीत हा अर्थसंकल्प सादर झाला आहे. महायुती सरकारच्या काळातील हा पहिलाच अर्थसंकल्प असल्याने राजकीयदृष्ट्याही याला विशेष महत्त्व प्राप्त झाले आहे. स्थायी समिती अध्यक्ष प्रभाकर शिंदे यांच्याकडे हा दस्तऐवज सोपवल्याने आता यावर सविस्तर चर्चा होऊन त्याला अंतिम मंजुरी दिली जाईल. मुंबई ही देशाची आर्थिक राजधानी असल्याने या अर्थसंकल्पीय तरतुदींचा परिणाम केवळ शहरावरच नव्हे, तर राज्याच्या अर्थव्यवस्थेवरही होत असतो.
या अर्थसंकल्पात कोस्टल रोड, गोरेगाव-मुुलुंड लिंक रोड, सांडपाणी प्रक्रिया प्रकल्प आणि रस्ते कॉंक्रिटीकरण यांसारख्या महत्त्वाकांक्षी प्रकल्पांसाठी भरीव निधीची तरतूद करण्यात आली आहे. आरोग्य, शिक्षण आणि पर्यावरण या क्षेत्रांनाही यंदाच्या बजेटमध्ये प्राधान्य देण्यात आले आहे. मुंबईकरांचे जीवनमान उंचावण्यासाठी आणि शहराला जागतिक दर्जाच्या सुविधा पुरवण्यासाठी हा अर्थसंकल्प मैलाचा दगड ठरेल, असा विश्वास महापालिका प्रशासनाकडून व्यक्त करण्यात आला आहे. आता या अवाढव्य निधीची प्रत्यक्ष अंमलबजावणी कशी होते, याकडे सर्व मुंबईकरांचे लक्ष लागले आहे.
