मुंबई | Mumbai
गुरुवारी शेअर बाजारात मोठी आपत्ती आली. सेन्सेक्स आणि निफ्टी दोन्ही निर्देशांक 3 टक्क्यांहून अधिक कोसळले आणि तीन दिवसांची तेजी एकाच दिवसात संपुष्टात आली. कच्च्या तेलाच्या किमतींमध्ये झालेली मोठी वाढ आणि जागतिक बाजारांमधील नकारात्मक वातावरण हे यामागील प्रमुख कारण ठरले.
सेन्सेक्स जवळपास 2573.23 अंकांनी 74,130 वर व्यवहार करत आहे. निफ्टी देखील 787.60 अंकानी घसरून 22,990 च्या खाली आला आहे. आज बँकिंग आणि ऑटो क्षेत्रातील शेअर्सची मोठ्या प्रमाणात विक्री होत आहे. बाजाराची स्थिती पूर्णपणे नकारात्मक होती 864 शेअर्स वाढले. 3,048 शेअर्स घसरले आणि 122 शेअर्समध्ये कोणताही बदल झाला नाही.
एकाच दिवसात १२ लाख कोटी रुपयांची घट
बीएसईवर सूचीबद्ध कंपन्यांचे एकूण बाजार भांडवल कालच्या ४३९ लाख कोटी रुपयांवरून आज ४२७ लाख कोटी रुपयांपर्यंत घसरले आहे. याचा अर्थ, केवळ एका दिवसात गुंतवणूकदारांच्या संपत्तीत १२ लाख कोटी रुपयांची घट झाली आहे.
निफ्टीच्या सर्व 16 प्रमुख क्षेत्रीय निर्देशांकांनी घसरण नोंदवली. बँकिंग आणि वित्त क्षेत्र सुमारे 3 टक्क्यांनी खाली आले. Nifty Smallcap100 आणि Nifty Midcap100 हे दोन्ही निर्देशांक सुमारे 2 टक्क्यांनी घसरले.
प्रमुख शेअर्समध्ये घसरण
सेंन्सेक्सवर इटरनल ५.४६%, बजाज फायनान्स ५.३४%, महिंद्रा अँड महिंद्रा ४.८६%, एलअँडटी ४.५७%, एचडीएफसी बँक ४.३५%, इंडिगो ४.२१% आणि बजाज फिनसर्व्ह ४.०८ टक्क्यांनी घसरले आहेत. केमिकल क्षेत्रातील कंपनी ‘कॅमलिन फाईन सायन्सेस’मध्ये सर्वाधिक ६.८७% घसरण झाली असून तो शेअर १२०.६० रुपयांवर आला आहे, तर फार्मा क्षेत्रातील दिग्गज कंपनी सिप्लामध्येही २ टक्क्यांहून अधिक घट झाली आहे. क्षेत्रीय नुकसानीचा विचार करता, निफ्टी ऑटो ४.१% पेक्षा जास्त कोसळला आहे. रिअल्टी क्षेत्रात ३.४% तर मेटल, आयटी, कन्झ्युमर ड्युरेबल्स आणि बँकिंग निर्देशांकात सुमारे ३ टक्क्यांची घसरण झाली.
मध्य पूर्वेतील संघर्षा मुळे तेल आणि वायूच्या किमतीत झालेल्या प्रचंड वाढीमुळे महागाई वाढण्याची आणि आर्थिक विकासावर परिणाम होण्याची भीती निर्माण झाली आहे, ज्याचा दबाव जागतिक इक्विटी मार्केटवर दिसून येत आहे. युरोपचा ‘स्टॉक्स ६००’ १.२ टक्क्यांनी घसरून या वर्षातील सर्वात खालच्या स्तरावर आला आहे, तर MSCI आशिया पॅसिफिक इंडेक्समध्ये २.७% आणि उदयोन्मुख बाजारपेठेतील इक्विटीमध्ये २.६% घट झाली आहे.
कच्चा तेलाच्या किमतीत मोठी वाढ
अमेरिका इस्रायलचे इराणसोबत सुरू असलेल्या युद्धामुळे कच्च्या तेलाच्या किमतीत मोठी वाढ झाली आहे. पर्शियन आखातातून होणाऱ्या पुरवठ्यात व्यत्यय आल्याने जागतिक ब्रेंट क्रूड किमती घसरल्या आहेत. आज किमती 4 टक्क्यांपेक्षा जास्त वाढून प्रति बॅरल $112 च्या पुढे गेल्या. होर्मुझच्या सामुद्रधुनीतून जाणाऱ्या तेलवाहू जहाजांबाबत बाजार आता अधिक जोखीम पत्करत आहे. इराणसोबतच्या अमेरिका-इस्रायल संघर्षामुळे जहाजांच्या वाहतुकीवर परिणाम झाला असून, विमा आणि मालवाहतुकीचा खर्च वाढला आहे.
