नवी दिल्ली | वृत्तसंस्था
कॉमनवेल्थ गेम्स 2026 मध्ये भारताच्या ज्यूदोपटूंनी इतिहास रचत देशाच्या पदकसंख्येत आणखी दोन सुवर्णपदकांची भर घातली. महिलांच्या 48 किलो वजनी गटात अस्मिता डे आणि पुरुषांच्या 60 किलो वजनी गटात हर्ष सिंह यांनी शानदार विजय मिळवत सुवर्णपदकावर नाव कोरले. विशेष म्हणजे, महिला गटात भारताचे हे पहिलेच सुवर्णपदक, तर पुरुष गटातही भारताचे पहिले सुवर्णपदक ठरले.
अस्मिता डे हिने अंतिम फेरीत कॅनडाच्या हायडी क्वाच (Heidi Quach) हिचा अत्यंत रोमांचक लढतीत पराभव केला. ही लढत निर्धारित वेळेत बरोबरीत सुटल्यानंतर ‘गोल्डन स्कोअर’मध्ये गेली. तिथे अस्मिताने संयम आणि आक्रमक खेळाचे उत्कृष्ट प्रदर्शन करत निर्णायक गुण मिळवला आणि सुवर्णपदक पटकावले. या विजयासह तिने कॉमनवेल्थ गेम्समध्ये महिलांच्या ज्युडोमध्ये भारताला पहिले सुवर्णपदक मिळवून देण्याचा मान पटकावला.
दुसरीकडे, पुरुषांच्या 60 किलो वजनी गटात हर्ष सिंह याने अंतिम सामन्यात ऑस्ट्रेलियाच्या जोशुआ कॅट्झ (Joshua Katz) याचा एकतर्फी पराभव करत सुवर्णपदक जिंकले. संपूर्ण सामन्यात हर्षने वर्चस्व राखत 10-0 अशा फरकाने विजय मिळवला. जोशुआ कॅट्झ हा यापूर्वीचा कॉमनवेल्थ पदकविजेता असल्याने हर्षचा हा विजय अधिक उल्लेखनीय मानला जात आहे.
यापूर्वी अस्मिता डे, हर्ष सिंह आणि यामिनी मौर्य यांनी अंतिम फेरीत प्रवेश करून भारतासाठी किमान रौप्यपदके निश्चित केली होती. मात्र अंतिम फेरीत अस्मिता आणि हर्ष यांनी सुवर्णपदकाची कमाई करत भारताचा झेंडा उंचावला.
कॉमनवेल्थ गेम्स 2026 स्पर्धा अंतिम टप्प्यात असताना भारतीय खेळाडू सातत्याने उत्कृष्ट कामगिरी करत आहेत. ज्यूदोमधील या दोन ऐतिहासिक सुवर्णपदकांमुळे भारताच्या पदकतालिकेत आणखी भर पडली असून, भारतीय क्रीडा इतिहासात अस्मिता डे आणि हर्ष सिंह यांच्या नावाची सुवर्ण अक्षरांनी नोंद झाली आहे.
