दिल्ली | वृत्तसंस्था Delhi
भारतीय राष्ट्रीय महामार्ग प्राधिकरणाने (एनएचएआय) आर्थिक वर्ष 2026-27 साठी फास्टॅग वार्षिक पासच्या शुल्कात वाढ करण्याची घोषणा केली आहे. सध्या असलेले 3,000 रुपये शुल्क वाढवून 3,075 रुपये करण्यात आले असून हे नवे दर 1 एप्रिल 2026 पासून लागू होणार आहेत.
एनएचएआयकडून करण्यात आलेली ही वाढ ‘राष्ट्रीय महामार्ग शुल्क (दरांचे निर्धारण आणि वसुली) नियम, 2008’ नुसार करण्यात आली आहे. सध्या देशभरात 56 लाखांहून अधिक वाहनधारक फास्टॅग वार्षिक पासचा वापर करत असून खाजगी वाहन मालकांमध्ये त्याचा वापर सातत्याने वाढत आहे.
हे सुधारित दर राष्ट्रीय महामार्ग आणि राष्ट्रीय द्रुतगती मार्गांवरील सुमारे 1,150 टोल प्लाझांवर लागू असतील. वैध फास्टॅग असलेल्या पात्र गैर-व्यावसायिक वाहनांसाठी ही सुविधा उपलब्ध आहे.
फास्टॅग वार्षिक पासमुळे एकदाच शुल्क भरून एका वर्षासाठी किंवा 200 टोल प्लाझा क्रॉसिंगपर्यंत टोल भरता येतो. त्यामुळे वारंवार फास्टॅग रिचार्ज करण्याची गरज राहत नाही.
वाहनधारकांनी शुल्क भरल्यानंतर राजमार्गयात्रा अॅप किंवा एनएचएआयच्या संकेतस्थळाद्वारे केलेल्या पेमेंटच्या दोन तासांच्या आत वाहनाशी लिंक असलेल्या फास्टॅगवर वार्षिक पास सक्रिय होतो.
दरम्यान, 15 ऑगस्ट 2025 रोजी सुरू करण्यात आलेल्या या सुविधेला देशभरातील वाहनचालकांकडून मोठा प्रतिसाद मिळत असून यामुळे राष्ट्रीय महामार्गांवरील प्रवास अधिक सोयीस्कर आणि किफायतशीर झाल्याचे एनएचएआयने सांगितले आहे.
