येवला । प्रतिनिधी Yeola
भरधाव डंपरने मोटारसायकलला जोरदार धडक दिल्याने झालेल्या भीषण अपघातात कोपरगाव येथील दोन तरुणांचा जागीच मृत्यू झाला. आसिफ मोहम्मद शेख (वय ३२) आणि सईफ रफिक शेख (वय १७), रा. कोपरगाव (जि. अहिल्यानगर), अशी मृतांची नावे आहेत.
दोघेही मोटारसायकल (क्रमांक १७ बीडब्ल्यू ५८६४) वरून प्रवास करीत असताना येवला – कोपरगाव महामार्गावर बजरंग हॉटेल समोर त्यांच्या मोटारसायकलला डंपरने (क्रमांक एमएच १२ एलटी ९९८०) जोरदार धडक दिली. या अपघातात दोघेही मोटारसायकलस्वार डंपरच्या चाकाखाली आल्याने गंभीर जखमी होऊन त्यांचा घटनास्थळीच मृत्यू झाला. सदर अपघात रविवारी, सकाळी साडे अकरा वाजेच्या सुमारास घडला.
दरम्यान, अपघाताची माहिती मिळताच पोलिसांनी घटनास्थळी धाव घेतली. मृतदेह उत्तरीय तपासणीसाठी रुग्णालयात पाठविण्यात आले असून डंपरचालकाविरुद्ध गुन्हा दाखल करण्याची प्रक्रिया सुरू आहे.
