सप्तशृंगीगड | वार्ताहर:
नांदुरी ते सप्तशृंगगड या रस्त्याच्या काँक्रिटीकरणाच्या कामामुळे वाहतुकीवर निर्बंध घालण्याबाबत प्रशासनाने सुधारित आदेश जारी केला आहे. १० सप्टेंबर २०२६ ते २६ सप्टेंबर २०२६ या कालावधीत रस्ता बंद ठेवण्यात येणार असला, तरी भाविकांची होणारी गैरसोय लक्षात घेऊन आठवड्याच्या सुट्टीच्या दिवशी रस्ता वाहतुकीसाठी खुला ठेवण्याचा निर्णय घेण्यात आला आहे.
सुधारित आदेशानुसार शनिवार दि. १२ सप्टेंबर, रविवार दि. १३ सप्टेंबर, शनिवार दि. १९ सप्टेंबर, रविवार दि. २० सप्टेंबर तसेच शनिवार दि. २६ सप्टेंबर २०२६ रोजी नांदुरी–सप्तशृंगगड मार्ग वाहतुकीसाठी सुरू राहणार आहे. त्यामुळे सप्ताहअखेर देवीच्या दर्शनासाठी येणाऱ्या हजारो भाविकांना मोठा दिलासा मिळणार आहे.
रस्त्याचे काँक्रिटीकरणाचे काम सुरू असल्याने कामाच्या कालावधीत वाहतूक बंद ठेवण्याचा निर्णय घेण्यात आला होता. मात्र सप्तशृंगगड हे प्रमुख तीर्थक्षेत्र असल्याने शनिवार व रविवारच्या दिवशी भाविकांची मोठी गर्दी होत असते. ही बाब लक्षात घेऊन प्रशासनाने पूर्वीच्या आदेशात सुधारणा केली आहे.
पायी मार्ग नियमित सुरू
रस्ता बंद असलेल्या दिवसांमध्ये नांदुरी ते सप्तशृंगगड पायी जाणारा मार्ग नियमित खुला राहणार असल्याचे आदेशात स्पष्ट करण्यात आले आहे. तसेच अत्यावश्यक सेवा, रुग्णवाहिका आणि स्कूल बस यांना आवश्यकतेनुसार मार्ग उपलब्ध करून देण्यात येणार आहे.
प्रशासनाचे भाविकांना आवाहन
रस्त्याचे काम सुरू असताना नागरिकांनी प्रशासनाच्या सूचनांचे पालन करावे आणि बंद कालावधीत विनाकारण वाहन घेऊन या मार्गावर येऊ नये, असे आवाहन करण्यात आले आहे. रस्त्याचे काम सुरक्षितपणे पूर्ण करण्यासाठी सर्वांनी सहकार्य करावे, असेही प्रशासनाने म्हटले आहे.
महत्त्वाच्या तारखा :
रस्ता बंद : १० सप्टेंबर ते २६ सप्टेंबर २०२६
रस्ता सुरू : १२ सप्टेंबर, १३ सप्टेंबर, १९ सप्टेंबर, २० सप्टेंबर व २६ सप्टेंबर २०२६
पायी मार्ग : नियमित सुरू
रुग्णवाहिका व अत्यावश्यक सेवांना परवानगी
