नाशिक | प्रतिनिधी
अचानक लागलेल्या आगीत कॉलेज रोडवरील एचपीटी कॉलेजसमोरील चार ते पाच अल्पोपहाराची दुकाने जळून खाक झाली. ही घटना आज रात्री सुमारे ११ वाजण्याच्या सुमारास घडली.
दुकान परिसरातून अचानक धूर निघताना दिसल्यानंतर उपस्थित नागरिकांनी आणि दुकानदारांनी तातडीने दुकान चालकांना सूचना दिल्या. लगेचच दुकाने उघडून पाहिली असता आगीने अचानक भडका उडाल्याचे निदर्शनास आले. यानंतर तात्काळ अग्निशामन दलाला पाचारण करण्यात आले.
सातपूर येथील शिंगाडा तलाव अग्निशामन केंद्राच्या जवानांनी घटनास्थळी दाखल होत तातडीने आगीवर नियंत्रण मिळवले. वेळीच कारवाई करण्यात आल्याने आग आजूबाजूच्या इतर दुकानांपर्यंत व परिसरात पसरण्यापासून रोखण्यात यश आले.
या आगीत झालेल्या नुकसानीचा नेमका आकडा अद्याप समजू शकलेला नाही. मात्र आग वेळेत आटोक्यात आणल्यामुळे मोठी वित्तहानी टळली असल्याचे सांगण्यात आले आहे.
