अहमदाबाद। Ahmedabad
क्रिकेट विश्वातील सर्वात प्रतिष्ठित आणि हायहोल्टेज समजली जाणारी लढत आज रंगणार आहे. टी-२० विश्वचषक २०२६ च्या अंतिम सामन्यात आज भारत आणि न्यूझीलंड हे दोन बलाढ्य संघ आमनेसामने येणार आहेत. अहमदाबादच्या भव्य नरेंद्र मोदी स्टेडियमवर हा ऐतिहासिक थरार पार पडणार असून, संपूर्ण जगाचे लक्ष या सामन्याकडे लागले आहे. सूर्यकुमार यादवच्या नेतृत्वाखालील भारतीय संघ कोट्यवधी भारतीयांचे विश्वविजेतेपदाचे स्वप्न पूर्ण करण्यासाठी मैदानात उतरेल, तर दुसरीकडे न्यूझीलंडचा संघ आपले पहिले टी-२० विश्वचषक जेतेपद पटकावण्यासाठी सर्वस्व पणाला लावेल.
न्यूझीलंडच्या या स्पर्धेतील प्रवासावर नजर टाकल्यास, त्यांनी अत्यंत चढ-उतारांनंतर अंतिम फेरीत धडक मारली आहे. अफगाणिस्तानला ५ विकेट्सनी नमवून त्यांनी मोहिमेची सुरुवात केली, तर दुसऱ्या सामन्यात १० विकेट्सनी विक्रमी विजय मिळवला. दक्षिण आफ्रिकेविरुद्ध पराभव पत्करावा लागल्यानंतरही त्यांनी कॅनडाला नमवून ‘सुपर ८’ मध्ये प्रवेश केला. सुपर ८ मध्ये पाकिस्तानविरुद्धचा सामना पावसामुळे रद्द झाला आणि इंग्लंडकडून पराभव स्वीकारावा लागल्याने किवींचा मार्ग खडतर झाला होता. मात्र, नेट रन रेटच्या जोरावर त्यांनी उपांत्य फेरीत स्थान मिळवले आणि तिथे दक्षिण आफ्रिकेचा ९ विकेट्सनी धुव्वा उडवत फायनलचे तिकीट निश्चित केले.
भारतीय संघाची कामगिरी या संपूर्ण स्पर्धेत सातत्यपूर्ण राहिली आहे. ग्रुप स्टेजमध्ये भारताने अमेरिका, नामिबिया, पाकिस्तान आणि नेदरलँड्स या सर्व संघांना पराभूत करून आपली ताकद दाखवून दिली. ‘सुपर ८’ मध्ये दक्षिण आफ्रिकेकडून एका पराभवाचा सामना करावा लागला असला तरी, झिम्बाब्वे आणि वेस्ट इंडिजवर मात करत भारताने दिमाखात उपांत्य फेरीत प्रवेश केला. उपांत्य फेरीच्या अटीतटीच्या लढतीत इंग्लंडचा पराभव करून टीम इंडियाने फायनलमध्ये धडक मारली आहे.
आजच्या या महामुकाबल्यात काही महत्त्वाच्या खेळाडूंच्या कामगिरीवर सर्वांच्या नजरा खिळलेल्या असतील. भारतीय गोटातून फॉर्मात असलेला संजू सॅमसन, अष्टपैलू हार्दिक पंड्या आणि जगातील सर्वोत्तम वेगवान गोलंदाज जसप्रीत बुमराह यांच्याकडून मोठ्या अपेक्षा आहेत. दुसरीकडे, न्यूझीलंडसाठी सलामीवीर टिम सेफर्ट आणि फिन ॲलन यांची स्फोटक फलंदाजी महत्त्वाची ठरेल, तर कर्णधार मिचेल सँटनरची फिरकी गोलंदाजी अहमदाबादच्या खेळपट्टीवर भारतीय फलंदाजांसाठी आव्हान ठरू शकते.
हा ऐतिहासिक अंतिम सामना भारतीय वेळेनुसार आज संध्याकाळी ७:०० वाजता सुरू होईल, तर नाणेफेक (टॉस) संध्याकाळी ६:३० वाजता होईल. क्रिकेट चाहत्यांना हा सामना स्टार स्पोर्ट्स नेटवर्कच्या विविध वाहिन्यांवर थेट पाहता येईल. तसेच, मोबाईलवर ‘जिओहॉटस्टार’ (JioHotstar) ॲप आणि वेबसाइटवर या सामन्याचे थेट प्रक्षेपण उपलब्ध असेल. अहमदाबादमधील हवामान खेळासाठी पोषक असून, कमी आर्द्रता आणि शांत वाऱ्यामुळे प्रेक्षकांना पूर्ण ४० षटकांचा थरार अनुभवायला मिळण्याची शक्यता आहे.
