दिल्ली | Delhi
लग्नाला अवघा एक महिना होत नाही, तोच इंदूर येथील राजा रघुवंशी याची निर्घृण हत्या झाल्याची धक्कादायक घटना समोर आली आहे. हनीमूनसाठी पत्नी सोनमसह शिलॉन्गला गेलेल्या राजाला घरापासून 2186 किलोमीटर दूर मृत्यूला सामोरे जावे लागले. या प्रकरणात पोलिसांनी सोनम रघुवंशी, तिचा कथित बॉयफ्रेंड आणि दोन सुपारी किलर्सना अटक केली आहे. तपासातून खळबळजनक माहिती समोर येत असून, सोनमच्या कुटुंबाने मात्र तिच्या निर्दोषतेचा दावा करत सीबीआय चौकशीची मागणी केली आहे.
17 दिवसांपूर्वी राजा आणि सोनम शिलॉन्गच्या जंगलातून गायब झाले होते. 2 जून रोजी राजाचा मृतदेह सापडल्यानंतर या प्रकरणाने वेगळे वळण घेतले. इंदूर आणि मेघालय पोलिसांनी संयुक्त तपास करत या गुन्ह्याचा उलगडा करण्यास सुरुवात केली. पोलिसांनी सोनम रघुवंशीसह तिचा कथित बॉयफ्रेंड राज कुशवाह, विक्की ठाकुर आणि आनंद यांना अटक केली आहे. तपासात राज कुशवाह हा या हत्येचा मास्टरमाइंड असल्याचे समोर आले आहे.
पोलिस तपासात असे दिसून आले की, सोनम आणि राज कुशवाह सतत संपर्कात होते. कॉल डिटेल रेकॉर्ड्स (CDR) च्या आधारे पोलिसांनी कुशवाहला ताब्यात घेतले. पोलिसांच्या मते, सोनमने राजाला शिलॉन्गला जाण्यासाठी दबाव टाकला आणि हा सगळा कट आधीच आखला गेला होता. राजाच्या हत्येमागे सोनम आणि तिच्या बॉयफ्रेंडचा हात असल्याचा पोलिसांचा दावा आहे.
सोनमचे वडील यांनी माध्यमांशी बोलताना आपली मुलगी निर्दोष असल्याचे सांगितले. “माझी मुलगी अशा कृत्यात सहभागी होऊच शकत नाही. ती एका बनावट कटात अडकली आहे. मेघालय पोलिसांनी खऱ्या गुन्हेगारांना पकडण्यात अपयश मिळाल्याने सोनमला बळीचा बकरा बनवले आहे,” असे त्यांनी ठामपणे सांगितले. त्यांनी या प्रकरणाची सीबीआय चौकशी व्हावी, अशी मागणी केली आहे. “जोपर्यंत सत्य समोर येत नाही, तोपर्यंत मी शांत बसणार नाही,” असेही ते म्हणाले.
राजा रघुवंशी यांच्या आई उमा यांनी सोनमवर गंभीर आरोप केले आहेत. “सोनमने राजाला न सांगता विमानाचे तिकीट बुक केले होते. तिच्या बोलण्यात गोडवा होता, त्यामुळे कोणालाही संशय आला नाही. तिने राजाला सोन्याची चेन घालण्यास सांगितले आणि शिलॉन्गला घेऊन गेली. हा सगळा कट आधीच ठरलेला होता,” असे त्यांनी सांगितले. भावनिक होताना त्या म्हणाल्या, “राजाच्या मृत्यूने आमचे कुटुंब उद्ध्वस्त झाले आहे. जर सोनम दोषी असेल, तर तिला कठोर शिक्षा झालीच पाहिजे.”
या प्रकरणात एकीकडे पोलिसांचे ठोस पुरावे आणि दावे आहेत, तर दुसरीकडे सोनमच्या कुटुंबाने तिच्या निर्दोषतेचा पुनरुच्चार केला आहे. सोनमच्या वडिलांनी मेघालय पोलिसांनी सादर केलेली माहिती एकतर्फी असल्याचे सांगितले. “ही माहिती अजून सिद्ध झालेली नाही. त्यामुळे कोणत्याही निष्कर्षावर येण्यापूर्वी सत्याचा शोध घ्यावा,” असे त्यांनी आवाहन केले आहे.
सध्या या प्रकरणाचा तपास अधिक तीव्र झाला आहे. पोलिसांनी अटक केलेल्या संशयितांकडून अधिक माहिती मिळवण्याचा प्रयत्न सुरू आहे. सोनमच्या कुटुंबाने केलेली सीबीआय चौकशीची मागणी आता जोर धरत आहे. या प्रकरणात खरे सत्य काय आहे, हे पुढील तपासातच स्पष्ट होणार आहे.
या हत्याकांडाने इंदूर आणि मेघालयात खळबळ माजवली आहे. एका नवविवाहित जोडप्याचा हनीमून मृत्यूचा सापळा ठरेल, अशी कल्पनाही कोणी केली नव्हती. पोलिसांचा तपास आणि सोनमच्या कुटुंबाचा बचाव यामुळे हा विषय चर्चेचा ठरला आहे. आता सर्वांचे डोळे पुढील तपासावर आणि सत्याच्या उलगड्यावर लागले आहेत.
