मुंबई | प्रतिनिधी Mumbai
थेट परकीय गुंतवणूक (एफडीआय) आकर्षित करण्यात महाराष्ट्राने आपले अव्वल स्थान कायम राखले आहे. २०२४-२५ या आर्थिक वर्षाच्या दुसऱ्या तिमाहीत म्हणजे सप्टेंबर २०२४ पर्यंत सहा महिन्यात १ लाख १३ हजार २३६ कोटी रुपयांची गुंतवणूक महाराष्ट्रात आल्याची माहिती मुख्यमंत्री देवेंद्र फडणवीस यांनी शुक्रवारी एक्स या समाज माध्यमातून दिली. ही गुंतवणूक वार्षिक सरासरीच्या ९५ टक्के असल्याचे स्पष्ट करत महाराष्ट्र आता थांबणार नसल्याचे फडणवीस यांनी म्हटले आहे
पुन्हा अतिशय आनंदाने सांगतो की, आपला महाराष्ट्र सातत्याने परकीय गुंतवणूक आकर्षित करण्यात अग्रेसर आहे. आता २०२४-२५ या आर्थिक वर्षातील सप्टेंबरला संपलेल्या दुसर्‍या तिमाहीची आकडेवारी आली आहे. त्यात अवघ्या सहा महिन्यात १ लाख १३ हजार २३६ कोटी रुपये इतकी परकीय गुंतवणूक महाराष्ट्रात झाली आहे. गेल्या चार वर्षांतील सरासरी पाहिली तर १ लाख १९ हजार ५५६ कोटी रुपये वार्षिक गुंतवणूक महाराष्ट्रात आली आहे. याचाच अर्थ संपूर्ण वर्षभराच्या ९४.७१ टक्के गुंतवणूक ही फक्त सहा महिन्यात आल्याचे फडणवीस यांनी आपल्या पोस्टमध्ये म्हटले आहे.
मी महाराष्ट्राचे मन:पूर्वक अभिनंदन करतो. माझे सहकारी उपमुख्यमंत्री एकनाथराव शिंदे, उपमुख्यमंत्री अजितदादा पवार आणि संपूर्ण मंत्रिमंडळाच्या नेतृत्त्वात आपल्या महाराष्ट्राची ही घौडदौड अशीच कायम राहील, अशी ग्वाहीही फडणवीस यांनी दिली आहे.
महाराष्ट्रात झालेली थेट परकीय गुंतवणूक
वर्ष गुंतवणूक (कोटी रुपये)
२०२०-२१ :१ लाख १९ हजार ७३४
२०२१-२२ : १ लाख १४ हजार ९६४
२०२२-२३ : १ लाख १८ हजार ४२२
२०२३-२४ : १ लाख २५ हजार १०१
२०२४-२५ (एप्रिल ते सप्टेंबर या सहा महिन्यात) : १ लाख १३ हजार २३६
देशदूतच्या व्हाट्सॲप ग्रुपला जॉईन होण्यासाठी लिंकवर क्लिक करा
