जालना । Jalna
मराठा आरक्षणाच्या मागणीसाठी सुरू असलेल्या आंदोलनाची धग कायम असून, मनोज जरांगे पाटील यांच्या उपोषणाचा आज १६वा दिवस आहे. १५ सप्टेंबर रोजी मुंबईकडे मोर्चा वळवण्याची भूमिका त्यांनी पुन्हा स्पष्ट केली आहे. “पाऊस असो वा कडक ऊन, मराठा समाज आता मुंबईकडे धडकणारच,” असा रोखठोक इशारा देत मनोज जरांगे यांनी राज्य सरकारच्या भूमिकेवर तीव्र संताप व्यक्त केला.
आंदोलनाच्या काळात आपल्या जवळच्या सहकाऱ्याला त्रास दिला जात असल्याचा आरोप करत जरांगे पाटील यांनी सरकारवर निशाणा साधला. “हे संपूर्ण महाराष्ट्राला दिसत आहे,” असे ते म्हणाले. आंदोलन सुरू असताना चौकशा आणि इतर कारवाया होत असल्याबाबतही त्यांनी प्रश्न उपस्थित केले. गणेशोत्सवाच्या पार्श्वभूमीवर मुंबईकडे मोर्चा काढण्याबाबत काही अडचणी निर्माण होणार असल्याच्या चर्चेवरही त्यांनी भूमिका मांडली. गणेशोत्सव हा आपलाही सण असून, मराठा समाजाच्या आरक्षणाची मागणीही कायम आहे, असे सांगत सणामुळे आंदोलनाच्या मागणीवर परिणाम होणार नसल्याचे त्यांनी स्पष्ट केले.
सरकारला पुरेसा वेळ आणि संधी दिल्याचा दावा करत जरांगे पाटील म्हणाले की, २९ ऑगस्ट २०२३ पासून मराठा आरक्षणाच्या प्रश्नावर सरकारला वेळ दिला आहे. त्यानंतरही मागणी पूर्ण झाली नसल्याने आता मुंबईकडे जाण्याचा निर्णय घेतल्याचे त्यांनी सांगितले. मागणी पूर्ण करण्यासाठी आणखी काही दिवसांची संधी असल्याचेही त्यांनी नमूद केले. सरकारकडून आंदोलनाला रोखण्याचा प्रयत्न होत असल्याचा आरोप करत त्यांनी सांगितले की, अशा प्रकारच्या कारवायांमुळे आंदोलन थांबणार नसून उलट समाजामध्ये अधिक रोष निर्माण होऊ शकतो. सरकारने मराठा समाजाच्या मागणीवर सकारात्मक निर्णय घ्यावा, अशी अपेक्षाही त्यांनी व्यक्त केली.
दरम्यान, राज्यातील पावसाबाबत बोलताना जरांगे पाटील यांनी शेतकऱ्यांसाठी समाधान व्यक्त केले. पावसामुळे शेतीला फायदा होण्याची शक्यता असून सध्या आनंदाचे वातावरण असल्याचे त्यांनी सांगितले. मुसळधार पाऊस असो किंवा कडक ऊन, मराठा समाज मुंबईकडे येणारच, असा निर्धार त्यांनी व्यक्त केला. आता १५ सप्टेंबरच्या पार्श्वभूमीवर सरकार आणि आंदोलनकर्त्यांमध्ये पुढील काळात काय भूमिका घेतली जाते, याकडे राज्याचे लक्ष लागले आहे.
