मुंबई । Mumbai
मुंबईतील चेंबूर परिसरात शनिवारी एका निर्माणाधीन इमारतीचे काम सुरू असताना काळजाचा थरकाप उडवणारी दुर्घटना घडली आहे. सुभाष नगर परिसरातील एका इमारतीच्या बांधकामादरम्यान आठव्या मजल्यावरून सहा कामगार खाली कोसळले.
या भीषण अपघातात ५५ वर्षीय एका कामगाराचा दुर्दैवी मृत्यू झाला असून अन्य पाच जण गंभीर जखमी झाले आहेत. या घटनेमुळे परिसरात मोठी खळबळ उडाली असून बांधकामाच्या ठिकाणी असलेल्या सुरक्षिततेच्या प्रश्नावर आता गंभीर चर्चा सुरू झाली आहे.
मिळालेल्या सविस्तर माहितीनुसार, चेंबूरच्या सुभाष नगर येथील इमारत क्रमांक ३६ चे पुनर्विकासाचे काम सध्या सुरू आहे. शनिवारी दुपारी १२ च्या सुमारास या इमारतीच्या सहाव्या आणि आठव्या मजल्यावर विटांच्या बांधकामाचे काम सुरू होते. यावेळी अचानक सहा कामगारांचा तोल गेला आणि ते थेट खाली कोसळले.
ही घटना घडताच परिसरातील नागरिकांनी मदतीसाठी धाव घेतली. या अपघाताची माहिती मिळताच स्थानिक पोलीस आणि अग्निशमन दलाच्या जवानांनी तात्काळ घटनास्थळी धाव घेत बचाव कार्य सुरू केले. अपघातातील सर्व सहा जखमी कामगारांना तातडीने उपचारासाठी घाटकोपर येथील राजावाडी रुग्णालयात दाखल करण्यात आले.
मात्र, रुग्णालयात पोहोचण्यापूर्वीच ५५ वर्षीय रामालू या कामगाराचा मृत्यू झाला होता. डॉक्टरांनी त्यांना तपासून मृत घोषित केले. इतर पाच जखमींवर सध्या उपचार सुरू असून, त्यापैकी २२ वर्षीय गुणाधर राय याची प्रकृती अत्यंत चिंताजनक आहे. त्याला रुग्णालयातील अतिदक्षता विभागात (MICU) दाखल करण्यात आले असून डॉक्टर त्याच्या प्रकृतीवर बारकाईने लक्ष ठेवून आहेत.
या अपघातातील इतर जखमींमध्ये उसराय (३०), रमेश राय (२५), विजय (३५) आणि संदीप (२७) या कामगारांचा समावेश आहे. प्राथमिक माहितीनुसार, या सर्व कामगारांना गंभीर स्वरूपाच्या जखमा झाल्या असून त्यांच्यावर विविध वॉर्डांमध्ये उपचार सुरू आहेत. भरवस्तीत आणि दिवसाढवळ्या घडलेल्या या घटनेमुळे बांधकाम कामगारांच्या सुरक्षेचा मुद्दा पुन्हा एकदा ऐरणीवर आला आहे. घटनेनंतर इमारतीच्या परिसरात नागरिकांची मोठी गर्दी जमली होती.
या भीषण दुर्घटनेमागचे प्राथमिक कारण समोर आले असून, कामगारांनी कामाच्या वेळी सुरक्षिततेच्या नियमांचे पालन केले नसल्याचा अंदाज वर्तवण्यात येत आहे. प्रत्यक्षदर्शी आणि प्राथमिक तपासानुसार, उंचावर काम करत असताना या कामगारांनी हेल्मेट किंवा सेफ्टी बेल्ट (सुरक्षा पट्टा) यांसारख्या आवश्यक सेफ्टी किटचा वापर केला नव्हता. सुरक्षा साधनांचा अभाव असल्यामुळेच इतक्या उंचावरून पडल्यानंतर कामगारांना गंभीर दुखापत झाली आणि एकाला आपला जीव गमवावा लागला, असे बोलले जात आहे.
सध्या मुंबई महानगरपालिका प्रशासन आणि पोलीस या प्रकरणाचा अधिक तपास करत आहेत. इमारतीच्या कंत्राटदाराने कामगारांना सुरक्षा साधने पुरवली होती की नाही, तसेच बांधकामाच्या ठिकाणी सुरक्षेचे इतर नियम पाळले जात होते का, याची कसून चौकशी केली जात आहे. निष्काळजीपणा आढळल्यास संबंधित जबाबदार व्यक्तींवर कडक कायदेशीर कारवाई करण्याचे संकेत प्रशासनाने दिले आहेत. या घटनेमुळे बांधकाम क्षेत्रातील मजुरांच्या जीविताच्या सुरक्षेबाबत संताप व्यक्त केला जात आहे.
