नवी दिल्ली वृत्तसंस्था | New Delhi
अमेरिकेच्या अंतराळ संस्था नासाने आर्टेमिस २ मिशन केनेडी अंतराळ केंद्रावरून यशस्वीरित्या लाँच केले. अमेरिकेच्या वेळेनुसार, संध्याकाळी ६ वाजून २४ मिनिटांनी (भारतीय वेळेनुसार, गुरुवारी पहाटे ३.५४ वाजता) हे मिशन सुरु झाले. नासाच्या अपोलो मोहिमेनंतर ५० वर्ष कोणत्याही मानवाने पृथ्वीपासून इतका मोठा प्रवास केला नव्हता. नासाच्या ‘आर्टेमिस-२’ अभियानाद्वारे चार अंतराळवीर चंद्राभोवती एक प्रदक्षिणा घालतील आणि सुमारे दहा दिवसांनी पृथ्वीवर परततील.
नासाच्या या मोहिमेत चार अंतराळवीर सहभागी झाले आहे. विशेष म्हणजे नासाने आर्टेमिस २ मिशनसाठी आवश्यक असलेली वेट टेस्टिंग पूर्ण केली नाही. यापूर्वी फेब्रुवारीत ही टेस्ट झाली त्यावेळी गळती होत असल्याचे समोर आले होते. पण ही अडचण दूर करण्यात आल्याचा दावा करण्यात आला आणि कोणत्याही चाचणीशिवाय आता यान हे चंद्राकडे झेपावले आहे.
या अंतराळवीरांचा मोहिमेत सहभाग
नासाच्या आर्टेमिस २ मोहिमेसाठी चार अंतराळवीरांचा समावेश करण्यात आला असून यामध्ये रीड वाईजमॅन (मोहिम प्रमुख), विक्टर ग्लोवर (मोहिम चालक), क्रिस्टीना कोच (मोहिम तज्ज्ञ) आणि कॅनडा येथील अंतराळ संस्थेचे सदस्य जैरेमी हँसन (मोहिम तज्ज्ञ) आहेत. आंतरराष्ट्रीय अंतराळ स्थानकात जवळपास एक वर्ष घालवलेल्या ४७ वर्षीय कोच या चंद्राच्या परिसरात पोहोचणाऱ्या पहिल्याच महिला अंतराळवीर ठरणार आहेत.
मोहिमेचे खास वैशिष्ट्ये
आर्टेमिस-२ मोहिमेत अंतराळवीरांना चंद्राजवळ पोहोचण्यासाठी तीन ते चार दिवसांचा कालावधी लागणार आहे. अपोलो मोहिमेत देखील इतकाच कालावधी चंद्रापर्यंत पोहोचण्यासाठी लागला होता. आर्टेमिस २ मोहिमेच्या माध्यमातून सिस्टिमचे निरीक्षण करण्यात येईल. यामध्ये आपत्कालीन प्रक्रिया, रेडिएशनच्या माध्यमातून सुरक्षा आणि लेझरवर आधारीत अत्याधुनिक संवादाचे तंत्रज्ञान विकसीत होईल. ही मोहिम आगामी अंतराळ अभियानासाठी अत्यंत महत्त्वपूर्ण आहे. या मोहिमेअंतर्गत चंद्रावर पुन्हा मानवाला उतरवण्याचा आणि मंगळ ग्रहावर सुद्धा अंतराळवीराला उतरवण्याची तयारी करण्यात येत आहे. या मोहिमेचा केवळ इतकाच एक उद्देश नाही. चंद्रावर मानवी वसाहत तयार करण्यासाठी आणि मंगळ ग्रहावरही असाच वसाहतीचा प्रयोग राबवण्यासाठी ही मोहिम अत्यंत आवश्यक मानली जात आहे.
शक्तीशाली रॉकेटचा वापर
आर्टेमिस-२ मोहिमेसाठी नासा एसएलएस रॉकेटचा म्हणजेच स्पेस लाँच सिस्टिम रॉकेटचा वापर करत आहे. नासाकडे सध्या असलेले हे सर्वात शक्तिशाली रॉकेट आहे.
