पंचवटी | प्रतिनिधी | Panchvati
पंचवटी परिसरातील (Panchvati Area) बळी मंदिर उड्डाणपुलावर सोमवारी (२७ जुलै) रात्री उशिरा एक अत्यंत भीषण अपघात (Accident) घडला. भरधाव वेगाने आलेल्या एका अज्ञात मालवाहू ट्रकने दुचाकीला मागून जोरदार धडक दिली. या अपघातात ट्रकचे चाक डोक्यावरून गेल्याने महिलेचा जागीच दुर्दैवी मृत्यू (Death) झाला, तर तिचे पती गंभीर जखमी झाले आहेत. अपघातानंतर निष्काळजी चालक वाहनासह घटनास्थळावरून पसार झाला.
पोलिसांनी दिलेल्या माहितीनुसार, दीपक विश्वनाथ मोरे हे त्यांच्या पत्नीसह स्प्लेंडर मोटारसायकलने (एमएच ४१ यु ४४२५) प्रवास करत होते. बळी मंदिरासमोरील उड्डाणपुलावर (Flyover) आले असताना पाठीमागून अत्यंत वेगाने आलेल्या अज्ञात मालवाहू ट्रकच्या चालकाने रस्त्याच्या परिस्थितीकडे दुर्लक्ष करत दुचाकीला धडक दिली. धडक लागताच दोघेही रस्त्यावर फेकले गेले. दुर्दैवाने ट्रकचे चाक महिलेच्या डोक्यावरून गेल्याने त्यांचा जागीच मृत्यू झाला, तर दीपक मोरे यांच्या डोक्याला व हाताला गंभीर दुखापत झाली आहे.
अपघातात दुचाकीचेही मोठे नुकसान झाले आहे. या प्रकरणी मृत महिलेचे भाचे दीपक अमृत तमखाने (वय २६, रा. उत्तम नगर, सिडको, नाशिक) यांनी दिलेल्या फिर्यादीवरून पंचवटी पोलीस ठाण्यात (Panchvati Police Station) अज्ञात ट्रकचालकाविरुद्ध गुन्हा (Case) दाखल करण्यात आला आहे. मेरी पोलीस चौकीचे पोलीस उपनिरीक्षक कैलास जाधव या प्रकरणाचा पुढील तपास करत आहेत.
