नाशिक | प्रतिनिधी | Nashik
वातावरणातील बदलामुळे नाशिक शहरात साथीच्या आजारांनी डोके वर काढले असतानाच स्वाइन फ्लूच्या (Swine Flu) रुग्णसंख्येतही झपाट्याने वाढ होत आहे. मागील दहा दिवसांत तब्बल ६६ जणांना स्वाइन फ्लूची लागण झाल्याची माहिती समोर आली आहे. त्यामुळे शहरात (City) दररोज सरासरी सहा रुग्णांची भर पडत असल्याने आरोग्य यंत्रणेची चिंता वाढली आहे. सध्या संबंधित रुग्णांवर खासगी रुग्णालयांत उपचार सुरू आहेत.
मागील महिनाभरात स्वाइन फ्लूमुळे तीन जणांचा मृत्यू झाला असून, त्यातील दोन रुग्ण (Patient) ग्रामीण भागातील, तर एक रुग्ण नाशिक शहर हद्दीतील असल्याची माहिती आहे. त्यामुळे स्वाइन फ्लूच्या वाढत्या प्रादुर्भावामुळे नागरिकांमध्ये भीतीचे वातावरण निर्माण झाले आहे. सध्या शहरातील विविध रुग्णालयांच्या बाह्यरुग्ण विभागात ताप, सर्दी, खोकला, अंगदुखी यांसारखी लक्षणे असलेल्या रुग्णांची गर्दी वाढली आहे. डेंग्यू आणि मलेरियाच्या रुग्णांमध्ये वाढ होत असतानाच स्वाइन फ्लूचे रुग्णही वाढत असल्याने शहराच्या आरोग्य व्यवस्थेवर अतिरिक्त ताण निर्माण झाला आहे. सुरुवातीला साध्या सर्दी-खोकल्यासारखी दिसणारी लक्षणे पुढे गंभीर स्वरूप धारण करून फुफ्फुसांमध्ये संसर्ग व न्यूमोनियासारख्या गुंतागुंती निर्माण होऊ शकतात.
महापालिकेचे स्वाइन फ्लू कक्ष मात्र रिकामे
स्वाइन फ्लूचा वाढता प्रादुर्भाव लक्षात घेऊन महापालिका आरोग्य विभागाने नाशिक रोड (Nashik Road) येथील बिटको रुग्णालय आणि पंचवटीतील डॉ. झाकीर हुसेन रुग्णालयात प्रत्येकी दहा खाटांचे स्वाइन फ्लू कक्ष तयार केले आहेत. मात्र, या कक्षांमध्ये उपचार घेण्याऐवजी अनेक रुग्ण खासगी रुग्णालयांना प्राधान्य देत असल्याने महापालिकेचे हे कक्ष सध्या रिकामेच असल्याचे चित्र आहे.
लक्षणे दिसताच तपासणीचा सल्ला
“ताप, सर्दी, खोकला यांसारखी लक्षणे दिसल्यास अंगावर आजार काढू नये. तातडीने जवळच्या रुग्णालयात जाऊन वैद्यकीय तपासणी करून घ्यावी. स्वाइन फ्लूची लक्षणे जाणवल्यास विलंब न करता उपचार सुरू करणे आवश्यक आहे,” असे आवाहन महापालिकेचे वैद्यकीय अधिकारी डॉ. प्रशांत शेटे यांनी केले आहे.
