पटना । Patana
बिहारच्या राजकारणातून आज एक अत्यंत मोठी बातमी समोर आली आहे. मुख्यमंत्री नितीश कुमार यांनी आपल्या बिहार विधान परिषद सदस्यत्वाचा (MLC) अखेर राजीनामा दिला आहे. नितीश कुमार यांची नुकतीच राज्यसभेवर निवड झाली असून, नियमांनुसार त्यांना दोन्हीपैकी एका सभागृहाचे सदस्यत्व सोडणे बंधनकारक होते. त्यानुसार त्यांनी आज आपला आमदारकीचा राजीनामा सुपूर्द केला आहे. या निर्णयामुळे बिहारच्या सत्तासंघर्षात आता नव्या चर्चांना उधाण आले असून राज्याचा पुढील मुख्यमंत्री कोण असेल, याकडे सर्वांचे लक्ष लागले आहे.
नितीश कुमार यांनी आमदारकी सोडली असली तरी, तांत्रिकदृष्ट्या ते पुढील काही दिवस मुख्यमंत्री पदावर कायम राहणार आहेत. घटनात्मक नियमांनुसार, विधिमंडळाच्या कोणत्याही सभागृहाचा सदस्य नसलेली व्यक्ती सहा महिन्यांपर्यंत मुख्यमंत्री किंवा मंत्री पदावर राहू शकते. त्यामुळे नितीश कुमार तातडीने मुख्यमंत्रिपद सोडणार की पुढील सहा महिने या पदावर राहून राज्याचा कारभार पाहणार, याबाबत अद्याप अधिकृत स्पष्टीकरण देण्यात आलेले नाही. मात्र, त्यांनी आमदारकीचा राजीनामा दिल्याने त्यांच्या मुख्यमंत्रिपदाच्या राजीनाम्याचीही शक्यता राजकीय वर्तुळात वर्तवली जात आहे.
रविवार संध्याकाळपासूनच बिहारमध्ये राजकीय घडामोडींना वेग आला होता. नितीश कुमार राजीनामा देणार असल्याची कुणकुण लागताच जनता दल युनायटेडच्या (JDU) ज्येष्ठ नेत्यांनी मुख्यमंत्री निवासस्थानी धाव घेतली. यामध्ये जेडीयूचे राष्ट्रीय कार्यकारी अध्यक्ष संजय कुमार झा यांच्यासह मंत्री विजय कुमार चौधरी, विजेंद्र यादव आणि अशोक चौधरी यांसारख्या विश्वासू नेत्यांचा समावेश होता. या नेत्यांच्या उपस्थितीत झालेल्या खलबतांनंतर नितीश कुमार यांनी आपला निर्णय जाहीर केला.
नितीश कुमार यांच्या या निर्णयामुळे बिहारमध्ये नेतृत्वबदलाचे संकेत मिळत आहेत. जेडीयूमध्ये आता नितीश कुमार यांच्यानंतर मुख्यमंत्रिपदाची धुरा कोणाकडे सोपवली जाईल, याबाबत जोरदार खलबते सुरू आहेत. पक्षांतर्गत चर्चेत काही वरिष्ठ मंत्र्यांची नावे आघाडीवर असली तरी, नितीश कुमार यांचा अंतिम निर्णय काय असेल, हे अद्याप गुलदस्त्यात आहे. राज्यसभेवर निवडून गेल्यानंतर आता ते राष्ट्रीय राजकारणात मोठी भूमिका बजावणार असल्याचे स्पष्ट झाले आहे.
सध्या बिहारच्या राजकारणात ‘सस्पेन्स’ कायम असून नितीश कुमार पुढील काही तासांत किंवा दिवसांत मुख्यमंत्रिपदाचा राजीनामा देऊन नवीन नेत्याची निवड करणार का, याकडे संपूर्ण देशाचे लक्ष लागले आहे. जर त्यांनी मुख्यमंत्रिपद सोडले, तर बिहारला नवा मुख्यमंत्री मिळणार हे निश्चित आहे. मात्र, तोपर्यंत नितीश कुमार यांच्या पुढील राजकीय खेळीकडे सर्वांचे डोळे लागले आहेत.
