जळगाव – 

जिल्हापरिषदेच्या अध्यक्ष पदासाठी भाजपच्या सदस्यामध्ये रस्सीखेच सुरु झालेली आहे. महिला सर्वसाधारण प्रवर्गाचे आरक्षण जाहीर झाल्यानंतर महिला  सदस्यांची नावे आता चर्चेत येत आहेत.

भाजपामधील काही सदस्यांनी वरिष्ठ नेत्यांच्या भेटीगाठी घेत फिल्डींग लावली जात आहे. मात्र, भाजपचे ज्येष्ठ नेते एकनाथराव खडसे आणि माजी जलसंपदामंत्री गिरीश महाजन यांनी सुचविलेल्या उमेदवारांना जिल्हापरिषदेत सत्तेचे सोपान सर करता येणार आहे. तर दुसरीकडे राज्यात सत्ता परिवर्तनचा पॅटर्न जिल्हापरिषदेतही यशस्वी करण्यासाठी महाविकास आघाडीच्या गटनेत्यांची मोर्चे बांधणी सुरु आहे.  त्यामुळे राजकीय उलथापालथ होण्याची शक्यता वर्तविली जात आहे.

मिनीमंत्रालय संबोधल्या जाणार्‍या  जिल्हापरिषदेच्या अध्यक्ष, उपाध्यक्ष पदासाठी भाजपच्या सदस्यांमध्ये दावेदारी सुरू झालेली आहे. त्यादृष्टीने एक गट भाजपचे वरिष्ठ नेते एकनाथराव खडसे आणि दसरा गट माजी पालकमंत्री गिरीश महाजन यांच्याकडे फिल्डींग लावत असल्याच्या हालचाली गतीमान झालेल्या असल्याचे चित्र दिसून येत आहे.

जिल्हापरिषदेतील भाजपच्या गटनेत्याकडून नाराज सदस्यांची मनधरणी करुन अतिरिक्त कामे देण्याचे आश्वासन दिले आहे. मात्र, यापूर्वीही सत्ताधारी पक्षातील सदस्यांना निधी वाटपात डावलण्यात आले असून या नाराजीचा उद्रेक या निवडीत उमटण्याची शक्यता वर्तविली जात आहे.

त्यामुळे भाजप सदस्यांना एकसंघ राहण्याचे मोठे आव्हान भाजपच्या सदस्यांसह गटनेत्यांना पेलावे लागणार आहे. दरम्यान, भाजपमध्ये दोन गट पडले असून एक गट खडसे तर दुसरा गट महाजन यांना मानणारा आहे.

त्यामुळे कोणत्या गटाचा अध्यक्ष आणि उपाध्यक्ष होणार याविषयी चर्चांना उधान आले आहे. भाजपच्या एका गटाकडून गुप्त बैठक घेऊन वेगळी मोट बांधण्याच्या हालचाली होत असल्याची चर्चा आहे.

जिल्हा परिषदेवर भाजप पुन्हा आपले वर्चस्व ठेवण्यात यशस्वी होणार की महाविकास आघाडीच्या माध्यमातून परिवर्तन घडणार याविषयी 21 डिसेंबर रोजी चित्र स्पष्ट होईल.

जळगाव  – 

शालेय व महाविद्यालयीन विद्यार्थिनींसह अन्य तरुणी व महिलांच्या सुरक्षेसाठी पोलीस दलातर्फे हेल्पलाइन सुरू करण्यात आली आहे. मोबाइल क्रमांक  9860501091) व जिल्ह्यातील नागरिकांकरिता आपत्कालीन, तत्काळ सेवेकरिता मोबाइल क्रमांक  8956715100  व व्हाट्सअप क्रमांक  9422210701, पोलीस नियंत्रण कक्ष (जळगाव)येथे कार्यान्वित आहेत.

विद्यार्थिनी, महिलांच्या सुरक्षिततेसाठी तसेच त्यांना तत्काळ पोलीस मदत मिळावी, म्हणून जिल्ह्यात महिला पोलिसांचे निर्भया पथक , दामिनी पथक कार्यान्वित आहेत. या पथकासाठी स्वतंत्र वाहन असून त्यात वाहनचालक, पोलीस अधिकारी व कर्मचारीही महिलाच आहेत.

शहरातील शाळा, महाविद्यालय, सार्वजनिक ठिकाणी हे पथक सकाळी 9 ते रात्री 9 दरम्यान  गस्त घालत असतात. पोलिसांकडे विद्यार्थिनी, तरुणी, महिलांच्या तक्रारी आल्यास तातडीने घटनास्थळी पोहचून मदत केली जाते. पोलीस अधीक्षक डॉ. पंजाबराव उगले यांच्या संकल्पनेतून पोलीस नियंत्रण कक्ष जळगाव येथे  हेल्पलाइन मोबाइल क्रमांकाची सुविधा  कार्यान्वित केली.

मोबाइल क्रमांक 9860501091 विद्यार्थिनींसह  महिलांच्या सुरक्षिततेसाठी तसेच त्यांना तत्काळ मदतीसाठी सुविधा आहे. मोबाइल क्रमांक 8956715100 जिल्ह्यातील नागरिकांकरिता आपत्कालीन, तात्काळ सेवेकरिता मोबाइल क्रमांक 9860501091 जिल्ह्यातील नागरिकांकरिता आपत्कालीन सेवेसाठी ही सोय आहे.

प्रत्येक पोलीस स्टेशन प्रभारी अधिकारी हे त्या- त्या पोलीस ठाण्यांतर्गत शाळा, महाविद्यालय यांना दररोज भेट देऊन  प्राचार्य, मुख्याध्यापक, विद्यार्थी-विद्यार्थिनी यांचे समवेत सुरक्षिततेबाबत चर्चा करणार आहेत.

शाळा व महाविद्यालयात घडणार्‍या विविध गुन्हेगारी घटना ( रॅगिंग , अंमली पदार्थ सेवन , सायबर गुन्हे , मुलींची छेडखानी आदी ) वर वेळेत नियंत्रण मिळवण्यासाठी पोलीस व विद्यार्थी नाते तयार करण्यासाठी पोलीस स्टेशन स्तरावर  पोलीस काका, पोलीस दीदी ही योजना राबविली आहे.

वेगळ्या कंपन्या, आयटी हब  व महत्त्वाच्या ठिकाणी जिथे रात्री उशिरापर्यंत महिला काम करतात, अशा महिलांना सुरक्षिततेची भावना प्रदान करण्यासाठी  र्इीववू उेि  संकल्पना पोलीस स्टेशन स्तरावर राबविली आहे.

प्रकाश  तायडे : दीपनगर, ता.भुसावळ । 

राज्यातील महाविजनिर्मिती केंद्रातील यंदाचा बजेट हा निम्यावर आल्याने वीजनिर्मितीवर याचा मोठा परीणाम होणार असल्याचे चित्र आहे. त्याच प्रमाणे या वीजनिर्मिती केंद्रावर अवलंबून असलेल्या कंत्राटदार व मजूरांवर ही उपासमारीचे संकट कोसळणार आहे.

दीपनगर केंद्राला सन 2018 मध्ये संच क्रमांक 4 आणि 5 साठी वार्षिक 105 कोटी रुपयांचा तर जूना 210 संच क्रमांक 3 करीता 19 कोटींचा बजेट देण्यात आला होता. आता या वर्षी संच क्रमांक 4 आणि 5 साठी फक्त 67 कोटी रुपयांचा बजेट मुख्यालयाकडून मंजूर झाला आहे. तब्बल 38 कोटी रुपयांचा बजेट कमी केला. तर जुन्या 210 संचा करीता 14  कोटी रुपयांचा बजेट मंजूर झाला आहे. असा एकुण 43 कोटींचा एका वर्षात बजेट कमी केल्याने याचा फटका सहाजिकच वीजनिर्मितीवर होणार आहे.

येथील वीजनिर्मिती केंद्रात सद्या 500 मेगावॉटचे दोन संच कार्यान्वित आहे. तर 210 मेगावॉटचे संच क्रमांक 2 आणि 3 बंद आहे. यातील संच क्र.दोन कायमचा बंद करण्यात आला आहे.

तिसरा संच विजेची मागणी वाढली तरच सुरु होतो. बजेट मध्ये मोठ्या प्रमाणत कपात झाल्यामुळे संच चालवावे कसे म्हणून मुख्यअभियंता यांनी प्रत्येक विभागाच्या वार्षिक कामात 20 टक्के कपात करण्याचे आदेश दिले. त्याच प्रमाणे अत्यावश्यक कामे करावे असे सबंधित विभागाचे अधिकारी यांना सुचना दिल्या जाते आहे. मात्र याचा परिणाम कामगारांवर होत आहे.

या ठिकाणी जवळपास दोनशेच्यावर कंत्राटदार नोंदणीकत आहेत. त्यांच्याकडे परीसरातील जवळपास दोन ते तीन हजार कंत्राटी कामगार काम करतात. आधीच संच क्रमांक 1,2,3 बंद असल्याने अनेक कंत्राटी कामगार घरी बसले आहेत. आता अजून बजेट कमी करण्यात आला असल्याने अजून कंत्राटी कामगार आपोआपच कमी होतील. त्यांच्यासह कंत्राटदारांवर उपासमारीची वेळ आल्याशिवाय राहणार नाही.

एमईआरसी ने दिलेल्या आदेशाचे पालन आम्ही करीत आहे. त्यांनी ठरवून दिलेल्या बजेटमधे वीजनिर्मितीचे संच पुर्ण क्षमतेने कार्यान्वित  आहे. आमच्याकडे जेवढा बजेट उपलब्ध आहेत. त्यामध्ये चांगले काम करण्याचा प्रयत्न केला जात आहे. मुख्यालयाकडे बजेट वाढवून मिळवण्यासाठी विनंती केली आहे.

– पंकज सपाटे

मुख्यअभियंता दीपनगर विज निर्मिती प्रकल्प.

जळगाव – 

शहरातील फुले मार्केट हॉकर्स बांधवांनी मनपासमोर ठिय्या मांडला. यावेळी हॉकर्स मोठ्या संख्येने मनपा प्रांगणात उपस्थित होते. यावेळी हॉकर्स बांधवांनी आयुक्तांकडे आपल्या मागण्यांचे निवेदनही सादर केले.

फेरीवाला धारणानुसार आम्हाला कायमस्वरुपी व्यवसाय करण्यास परवानगी मिळावी असेही या हॉकर्सचे म्हणणे आहे. त्यानंतर मात्र अद्याप तीन आठवडे उलटल्यानंतरही फुले मार्केट हॉकर्स बांधवांना तेथे परत बसू दिले जात नसल्याने हॉकर्स बांधवांनी काल बुधवारी मनपात मोठ्या संख्येेने ठिय्या मांडला होता.

तत्पूर्वी काल सकाळी फुले मार्केटमध्ये जे हॉकर्स बजावल्यानंतर ही पुन्हा बसले होते अशांवर कारवाई करीत त्यांचे साहित्य मनपा अतिक्रमण विभागाने जप्त केले होते. तसेच बी. जे. मार्केटमधूनही हॉकर्स बांधवांवर मनपा अतिक्रमण विभागाने कारवाई करीत तेथील साहित्य जप्त करुन आणले होते.

यानंतर मात्र दोघा मार्केटमधील हॉकर्स धारकांंनी काल मनपात येवून ठिय्या मांडला होता.  गेल्या 15 दिवसापासून आमचा रोजगार बुडाल्याचे हॉकर्स बांधवांनी बोलून दाखविले.

आयुक्तांना दिले निवेदन

तत्पूर्वी हॉकर्स बांधवांनी तास दीड तास ठिय्या मांडल्यानंतर हॉकर्सनी आयुक्तांना निवेदन दिले. आम्हाला बसायला परवानगी द्या अशी मागणी पुन्हा हॉकर्स नी दिले. यावेळी हॉकर्सचे एक शिष्टमंडळ आयुक्तांच्या भेटीस गेेले होते. यावेळी नंदू भावसार, मनोज चौधरी, रविंद्र चौधरी, गोपाल कटारीया, गोविंद कुंभार, राजेंद्र नन्नवरे व इतर हॉकर्स उपस्थित होते.