श्रीरामपूर (प्रतिनिधी) – जिल्ह्यातील पंचायत समितीच्या पुढील अडीच वर्षांसाठी सभापती पदासाठी आरक्षण सोडत काल निघाली. त्यात श्रीरामपूर पंचायत समितीचे सभापतिपद नागरिकांचा मागास प्रवर्ग (ओ.बी.सी.) महिलेसाठी आरक्षित झाला आहे. त्यामुळे टाकळीभान पंचायत समिती राखीव गणातून निवडून आलेल्या ससाणे गटाच्या डॉ. वंदना ज्ञानेश्वर मुरकुटे यांची सभापतिपदी वर्णी लागण्याचा मार्ग मोकळा झाला आहे.

श्रीरामपूर पंचायत समितीमध्ये आठ सदस्य संख्या आहे. त्यात चार महिला सदस्य तर चार पुरुष सदस्य आहेत. गेल्या अडीच वर्षापूर्वी झालेल्या निवडणुकीत मुरकुटे-ससाणे या दोन गटाचे समसमान चार-चार सदस्य निवडून आले होते. पहिली अडीच वर्षे सभापतीपद खुले असल्याने मुरकुटे (महाआघाडी) गटाकडून दीपक पटारे तर ससाणे (काँग्रेस) गटाकडून अरुण पाटील नाईक यांनी उमेदवारी अर्ज दाखल केले होते. मात्र दोन्ही उमेदवारांना समसमान चार-चार मते मिळाल्याने चिठ्ठी टाकण्यात आली होती. त्यावेळी सभापतीपदी दीपक पटारे यांची लॉटरी लागली होती.

महिला सदस्यांपैकी दत्तनगर गणातील संगीता सुनील शिंदे या सर्वसाधारण खुल्या महिला प्रवर्गातून निवडून आलेल्या आहेत. उक्कलगाव गणातील कल्याणी सतीश कानडे या अनुसूचित जाती महिला प्रवर्गातून तर उंदिरगाव गणातील वैशाली अशोक मोरे या अनु.जाती महिला प्रवर्गातून निवडून आलेल्या आहेत. नव्याने झालेल्या आरक्षण सोडतीत नागरिकांचा मागास प्रवर्ग महिला असे आरक्षण निघाल्याने टाकळीभान (ना.मा.प्र.महिला) राखीव गणातून निवडून आलेल्या डॉ. वंदनाताई मुरकुटे यांचीच सभापतीपदी लागणार हे निश्चित झाले आहे.

पुढील अडीच वर्षासाठी सभापती पदाची माळ डॉ.वंदना मुरकुटे यांच्या गळ्यात पडणार असल्याने सोशल मीडियातून त्यांच्यावर आभिनंदनाचा वर्षाव सुरु झाला आहे. डॉ. मुरकुटे या ससाणे गटाच्या कट्टर समर्थक असल्याने पुढील अडीच वर्षासाठी पंचायत समितीची सत्ता ससाणे गटाकडे जाणार हे उघड झाले आहे.

श्रीगोंदा (तालुका प्रतिनिधी) – शहरासह तालुक्यातील ग्रामीण भागात खाजगी सावकाराचा सुळसुळाट सुरू असल्याने अनधिकृतपणे खाजगी सावकार शेकडा 20 ते 40 टक्के व्याजदराने पैसे देत आहेत. दिलेले पैसे वसुलीसाठी वेळप्रसंगी दहशत आणि घेतलेल्या कोर्‍या धनादेशाचा गैरवापर करून थेट कोर्ट केसेस करण्याच्या धमक्या देत असल्याचे अनेकांनी सांगितले. मात्र तक्रार केल्यास नसती आफत ओढवून घेण्यापेक्षा गप्प बसलेले बरे असे असताना तालुक्यातील ग्रामीण भागातून देखील अशा सावकारांच्या जाचाला कंटाळून जमिनी सावकारांच्या घशात गेल्या असल्याच्या प्रतिक्रिया आल्या आहेत.

दैनिक सार्वमत मध्ये दोन दिवसांपासून अनधिकृत सावकारांच्या बाबत बातम्या प्रसिद्ध होत आहे. शहरात अनेकांनी बातम्याचे कात्रण करून ठेवले असताना ग्रामीण भागातील अशा प्रकारे सावकारांच्या जाचाला कंटाळून वेळप्रसंगी जमीन जायदाद लिहून द्यावी लागली असल्याच्या प्रतिक्रिया आल्या आहेत. मात्र एवढा अन्याय होऊनही तक्रार का दाखल केल्या नाहीत असे विचारले असताना एकमेव कारण हे या सावकारांच्या दहशत हेच असल्याचे समोर आले आहे. अशा तक्रारी केल्यास आधार कुणाचा नसल्याने अन्याय सहन करणारे गप्प आहेत.

शहरात आणि तालुक्यात अनेक तरुण छोटे मोठे व्यवसाय करत आहेत. या व्यवसायात आपली आर्थिक गरज भागवण्यासाठी अनेक वेळा बँक, पतसंस्थाच्या कडे कर्ज घ्यावे लागते. हे कर्ज अनेकांना उपलब्ध होते. मात्र अनेक जणांना कुठली पत नसल्याने सहज कर्ज उपलब्ध होत नाही अशी परिस्थिती असल्याने आपली गरज पूर्ण करण्यासाठी कुणापुढे तरी हाथ पसरावे लागत असतात. बँक, पतसंस्थामधून गरज सुटत असली तरी सगळ्यांना कर्ज मिळतेच असे नाही.

यापुढे जाऊन ऐन वेळी कुणी कर्ज देते असे ही नसल्याने तातडीने पैसे उपलब्ध होण्यासाठी अनेक वेळा खाजगी सावकारांच्या दारात जावे लागत असल्याने शहरात असे कर्ज देणारे अनेक जण आहेत. यांच्याकडे कुठला परवाना नाही मात्र ऐन वेळी कुणाच्या तरी मध्यस्थी ने पैसे दिले जात असले तरी एक महिन्यासाठी शेकडा पंधरा ते वीस टक्के प्रमाणे हे सावकार पैसे देत आहेत हे कर्जापेक्षा व्याज जास्त होत असल्याने अनेक तरुण या ओझ्याखाली दबले आहेत असे असले तरी ग्रामीण भागात आदिवासी भटक्या समाजाचे काही व्यक्तीकडून घेतलेले कर्ज फेडता आले नसल्याने वेळप्रसंगी दुपटीने पैसे देऊनही जमीन लिहून द्यावी लागली असल्याचे सांगितले आहे.

कारवाई करणार :सहायक निबंधक
श्रीगोंदा तालुक्यात 10 सावकारांना अधिकृत लायसन्स आहेत, पण अनेक जण खाजगी सावकारकीचा व्यवसाय करतात अशी चर्चा आहे. जे लोक खाजगी सावकाराच्या जाळ्यात अडकले त्यांनी तात्काळ तक्रार द्यावी. सावकारांवर कारवाई करण्यात येईल असे सह्ययक निबंधक रावसाहेब खेडकर यांनी सांगितले.

तक्रार द्या मुसक्या आवळणार : पोलीस निरीक्षक
श्रीगोंदा तालुक्यातील ज्यांनी खाजगी सावकाराकडून पैसे घेतले आहेत, त्यांनी श्रीगोंदा पोलीस ठाण्यात तक्रार दाखल कराव्यात. लगेच त्यांच्या मुसक्या आवळ्या जातील असे पोलीस निरीक्षक दौलतराव जाधव यांनी सांगितले.

औषध फवारणी करणार्‍या चार जणांविरुद्ध गुन्हा दाखल; चौघे अटकेत

राहाता (तालुका प्रतिनिधी) – राहाता पालिकेचे डास प्रतिबंधक फॉगिंग करताना चार जणांना डिझेल व पेट्रोलची अफरातफर करताना प्रभारी आयएएस महिला मुख्याधिकारी यांच्या पथकाने रंगेहाथ पकडले. 100 दिवसांत दोन लाख 16 हजार रुपयांची अफरातफर केल्याचा त्यांच्यावर गुन्हा दाखल करण्यात येऊन चारही आरोपींना अटक करण्यात आली आहे.

ही घटना राहाता शहरात जंगल प्रभागात बुधवारी 10 वाजेच्या सुमारास घडली. या प्रकरणी पालिकेचे कार्यालयीन अधीक्षक दीपक जग्रवाल यांनी दिलेल्या फिर्यादी वरून राहाता पोलिसांनी किरण बाळासाहेब थोरात, ललित सुनील निकाळे, अविनाश कैलास निकाळे, सागर राजू कासार या चार जणांना या अफरातफर प्रकरणी तसेच पालिकेचे वाहन घंटा गाडी विना परवानगी स्वत:च्या फायद्यासाठी वापरले म्हणून अटक केली.

याबाबतची हकीगत अशी की राहाता पालिकेच्या डास प्रतिबंधक फॉगिंगचे टेंडर एका खाजगी कंपनीला दि 10 जानेवारी 2019 पासून दिले होते. त्यासाठी लागणारे डिझेल व पेट्रोल पालिका पुरवीत होती. विश्वसाने दररोज दिल्या जाणार्‍या पेट्रोल व डिझेलमधे अफरातफर करून टेंडर दिल्यापासून ते 11 डिसेंबर 2019 रोजी रात्री 10 वाजेपर्यंत असे 100 दिवसांत डिझेलच्या दोन हजार लिटरचे 1 लाख 36 हजार रुपये व पेट्रोलच्या एक हजार लिटरच्या 80 हजार रुपयांची अशी एकूण 2 लाख 16 हजार रुपयाची अफरातफर केली. तसेच पालिकेच्या मालकीचे वाहन घंटा गाडी विना परवानगीने स्वत:च्या फायद्यासाठी त्याचा वापर केला. या प्रकरणी चौघा जणांवर फसवणूकीचा गुन्हा दाखल करन्यात आला असून चारही जणांना अटक करन्यात आली आहे. त्यांना न्यायालयात हजर केले असता दोन दिवसांची पोलीस कोठडी देण्यात आली.

गेल्या तीन महिन्यापासून राहाता शहरात डेंग्यू मलेरिया, थंडी ताप या साथीच्या रोगाने संपूर्ण राहाता शहराला विळखा घातला असताना शहरात फॉगिंग करावी अशी मागणी केली जात होती; मात्र प्रत्यक्षात औषध फवारणी होत नव्हती. यामुळे शेकडो नागरीक आजारी पडले. हजारो रूपये दवाखान्यात उपचारावर खर्च करावे लागले. या प्रश्नी सर्वच नगरसेवकांनी तक्रारी करूनही पालिका प्रशासन लक्ष देत नव्हते. कधी तरी एखाद्या प्रभागात तात्पुरती फवारणी केली जात असे. मात्र त्यासाठी लागणारे डिझेल व पेट्रोल रोज पालीकेकडून घेतले जात होते.

गेल्या आठ महिन्यांपासून पालिकेला मुख्याधिकारी नसल्याने येथे मनमानी कारभार सुरू होता. प्रभारी मुख्याधिकारी पालिकेकडे फिरकत नव्हते. या संधीचे पालिकेच्या काही अधिकारी व पदाधिकारी व ठेकेदार यांनी सोनं करून अनेक वेळी फवारणी न करता रोज डिझेल व पेट्रोल घेऊन अफरातफर केली. नुकत्याच पालिकेत मुख्याधिकारी म्हणून आलेल्या आयएएस महिला अधिकारी यांना संशय आल्याने त्यांनी या फॉगिंग करणार्‍या ठेकेदाराच्या माणसांवर लक्ष ठेवण्यासाठी एक गोपनीय पथक नेमले. सर्व माहिती व काय प्रकार होते हे लक्षात घेऊन सदर महिला अधिकारी यांनी बुधवारी 9:45 वाजेच्या सुमारास ज्या परिसरात औषध फवारणी सुरू होती तेथे पथकासह जाऊन ही चोरी पकडली. सदर कारवाईचे सर्व नगरसेवक व नागरीकांची स्वागत केले असून कर्तव्यदक्ष महिला अधिकारी असीमा मित्तल यांचे अभिनंदन केले आहे.

बड्या माशांवर कारवाईची मागणी
गेल्या 100 दिवसांपासून हा प्रकार राजरोस घडत होता. पाालिकेचे प्रमुख अधिकारीच संबंधितांना डिझेलसाठी पेट्रोल पंपावाल्याना लेखी चिठ्ठी देत होते. तर यावर देखरेख करणारे अधिकारी कोठे होते? ज्या कंपनीने हा ठेका घेतला होता त्यांचा कोणीच माणूस येथे नव्हता. मग हे काम कोण करत होते याचाही शोध घेण्याची गरज असून ज्या चार तरुणांना या गुन्ह्यात अटक केली ते बेरोजगार तरुण असल्याचे कळते. त्यातील काहीजण पहिल्यांदाच हे औषध फवारणी करीत गेले होते. यात अनेक बडे मासे गुंतले असून त्यांची चौकशी होणे गरजेचे असून जे अधिकारी याला जबाबदार आहे, त्यांच्यावरही कारवाई होणे गरजेचे असल्याचे नगरसेवक व नागरिकांचे म्हणणे आहे.