पेठ / नाशिक | प्रतिनिधी 

शेकडो घनमीटर लाकडाचा साठा हरसूल वनक्षेत्रात वनविभागाने छापा टाकून जप्त केला आहे. सदर साठा गुजरात कडे वाहून नेण्यात येणार असल्याची माहिती वनविभागाच्या पथकाला मिळाली होती. त्यानुसार वनविभागाच्या पथकाने छापा टाकत लाकडाचा साठा जप्त केला आहे.

अधिक माहिती अशी,  पेठ तालुक्यातील गुजरात सीमारेषेजवळ असलेल्या देवडोंगरी गावाजवळ खैराच्या झाडांची बेकायदेशीर कत्तल करून हे लाकूड गुजरात राज्यात नेण्यात येणार असल्याची समजले.

त्यानुसार वनविभागाच्या गस्तीवर असलेल्या पथकाने खैराची वाहतुक करणारे वाहन अडविले. मात्र, अंधाराचा फायदा घेऊन चोरटयांनी पोबारा केला.

हरसुल व पेठच्या जंगलातून रात्रीचे वेळी हरसूल येथील वनपरिक्षेत्राचे वनक्षेत्रपाल के.व्ही. सुर्यवंशी ,के,एस. एकशिंगे वनरक्षक एन.एस.पाटील, एम.एस. परडे, आनंदा पवार व वनमजूर रात्रीचे वेळी गस्त घालत असतांना रस्त्यावर आयशर कंपनी या डीएन ० ९, ९९२७ क्रमांकाचा टेम्पो आढळून आला.

गस्ती पथकाची चाहुल लागताच अंधाराचा फायदा घेऊन तस्कर फरार झाले. वाहनाची तपासणी केली असता त्यात बेकायदा कत्तल केलेले खैर वृक्षाचे ओंडके आढळून आले.

मालाचे मोजमाप केले असता ० .८१ घ . मी . त्याचे मुल्य ९,८०० व वाहनाचे मुल्य १ लाख ९० हजार असा एकूण दोन लाखांचा मुद्देमाल हस्तगत करण्यात आला आहे.

विभागीय व्यवस्थापक यु. सी. ढगे, सहा .व्यवस्थापक एस.एच.वाजे यांचे मार्गदर्शनाखाली बोरीपाडाचे वनक्षेत्रपाल सी.आर.ढोबळ, झरी वनक्षेत्राचे एम.पी.जोशी, वनमजूर यांच्या प्रयत्नांनी सदर कारवाई यशस्वी करण्यात आली.

नाशिक : शहरातील रिक्षांना उभेच राहण्यासाठी २०१५ मध्ये ठरविण्यात आलेल्या २६३ ठिकाणांपैकी २१२ ठिकाणांना अधिकृत रिक्षा थांबे म्हणून मंजुरी देण्याचा निर्णय पोलिसांनी घेतला आहे. मात्र गुरुवार (दि. १९) पासून एक महिन्यापुरतीच हि मंजुरी आहे.

शहरात २२ हजारांहून अधिक रिक्षा असून, रिक्षांच्या तुलनेत थांब्याची संख्या कमी आहे. रिक्षा संघटनेचे प्रतिनिधी यांच्या संयुक्त पथकाने शहरात सर्व्हे करून २६३ रिक्षा थांबे निश्चित केले होते, मात्र आजपर्यंत त्यावर निर्णय घेण्यात आलेला नव्हता. संघटनेच्या पदाधिकाऱ्यांनी शहरांमध्ये मान्यताप्राप्त थांबेच नसल्याची बाब गेल्या २६ नोव्हेंबर रोजी झालेल्या बैठकीत पुन्हा एकदा निदर्शनास आणून दिली होती.

त्यामुळे समस्या सोडविणाच्या दृष्टीने २१२ रिक्षा थांबे अधिकृत करण्याचा निर्णय पोलीस आयुक्त विश्वास नांगरे पाटील यांनी घेतला आहे, मात्र दि. १९ डिसेंबर ते १९ जानेवारी या काळात नागरिकांकडून येणाऱ्या हरकती आणि सूचनांची नोंद घेऊनच या २१२ थांब्यांना कायमस्वरूपी रिक्षा थांबा म्हणून दर्जा देण्यात येणार आहे. नागरिकांनी आपल्या हरकती आणि सूचना लेखी स्वरूपात शारांपुर रोड येथील वाहतूक शाखेकडे नोंदवाव्यात, असे आवाहन करण्यात आले आहे.

नाशिक । राज्याचे प्राथमिक शिक्षण संचालनालय टीईटी अनुत्तीर्ण शिक्षकांना पाठीशी का घालत आहे, असा प्रश्न उपस्थित केला जात आहे. शिक्षक पात्रता परीक्षा (टीईटी) अनुत्तीर्ण असलेल्या राज्यभरातील शिक्षकांची सेवा समाप्त करण्याच्या अवर सचिवांच्या आदेशाची प्राथमिक शिक्षण संचालनालयाकडून अद्याप अंमलबजावणी झालेली नाही.

राज्यात 13 फेब्रुवारी 2013 नंतर नियुक्त झालेल्या शिक्षकांना टीईटी उत्तीर्ण होण्यासाठी राष्ट्रीय शिक्षक शिक्षण परिषदेने 31 मार्च 2019ची मुदत दिली होती. या मुदतीत टीईटी उत्तीर्ण न झाल्यास सेवा समाप्त करण्याचे आदेश देण्यात आले होते. मात्र, ही मुदत वाढवण्याची राज्य शासनाची विनंती केंद्रीय मनुष्यबळ विकास मंत्रालयाने 3 जून 2019 च्या पत्रान्वये फेटाळून लावली. त्यामुळे 24 ऑगस्ट 2018 च्या शासन निर्णयानुसार संबंधित शिक्षकांच्या सेवा समाप्तीचे आदेश देण्यात आले. अवर सचिवांनी 25 नोव्हेंबरला प्राथमिक शिक्षण संचालनालयाला कारवाई करून अहवाल सादर करण्याबाबत स्पष्ट केले होते.

असे असतानाही प्राथमिक शिक्षण संचालनालयाकडून टाळाटाळ करण्यात येत असल्याने अद्याप प्रत्यक्ष कारवाई झालेली नाही. टीईटी अनुत्तीर्ण शिक्षकांची सेवा समाप्त केल्यास ते न्यायालयात धाव घेऊन आदेशावर स्थगिती मिळवतील या शक्यतेने शासनाकडून न्यायालयात कॅव्हेट दाखल करण्याचा निर्णय घेण्यात आला. या कामात थोडा वेळ गेल्याने अद्याप कारवाई झालेली नाही, असे सांगितले जात आहे.

दरम्यान, उच्च न्यायालयाच्या तिन्ही खंडपीठांमध्ये कॅव्हेट दाखल करण्याचे काम पूर्ण झाले असून टीईटी अनुत्तीर्णाची सेवा समाप्त करण्याच्या आदेशासंबंधीचा मसुदा तयार करून शासनाला सादर करण्यात येणार आहे. त्याला शासनाची मंजुरी मिळाल्यानंतर प्रत्यक्ष कार्यवाही करण्यात येईल, असे प्राथमिक शिक्षण संचालनालयाने स्पष्ट केले आहे.

नाशिक । मोबाइलमध्ये रोलेट जुगार इस्टॉल करून देत जुगार्‍यांना पैशांच्या मोबदल्यात पॉइंट देणार्‍या संशयितांविरोधात पोलीस आयुक्तांच्या अवैध धंदे कारवाई पथकाने कारवाई केली. कॉलेज रोडवरील एस. के. ओप मॉलच्या तळमजल्यावरील गाळ्यात बुधवारी (दि.18) रात्री ही कारवाई करण्यात आली असून याप्रकरणी सात जणांविरोधात गुन्हा दाखल करण्यात आला आहे.

कॉलेज रोडवरील एका दुकानात मोबाइलमध्ये बिंगो, फन रोलेट हे जुगार इन्स्टॉल करून देत जुगार्‍यांना पॉईंट दिले जात असल्याची माहिती पोलीस आयुक्त विश्वास नांगरे-पाटील यांना मिळाली. त्यांनी अवैध धंदे कारवाई पथकास कारवाई करण्याचे निर्देश दिले. त्यानुसार पथकाचे सहायक पोलीस निरीक्षक कुंदन सोनोने यांनी इतर सहकार्‍यांसोबत ही कारवाई केली. त्यात संशयित जोगंंदर उर्फ पप्पु रघुनंदन शहा हे त्याच्या गाळ्यात इंटरनेटच्या माध्यमातून जुगार्‍यांना ऑनलाइन जुगार गेम डाऊनलोड करून देत असल्याचे आढळून आले.

तसेच जुगार्‍यांकडून पैसे घेऊन त्यांना पॉइंट दिले जात असल्याचे उघडकीस आले. पोलिसांनी या ठिकाणाहून 1 लाख 35 हजार रुपयांची रोकड, वाहन, जुगाराचे साहित्य असा एकूण 4 लाख 899 हजार 770 रुपयांचा मुद्देमाल जप्त केला आहे. याप्रकरणी गंगापूर पोलीस ठाण्यात गाळा मालक शहा याच्यासह राहुल शाहु पटेल, जसविंदर रवींद्र सिंग, किरण साहेबराव ढोकळे, कमलेश अनिरुद्ध मंडल, राकेश शरद जाधव आणि कैलास जोगेंदर शहा यांच्याविरोधात गुन्हा दाखल केला आहे.

पथकाचे सहायक पोलीस निरीक्षक कुंदन सोनोने, सहायक पोलीस उपनिरीक्षक विजय शिरसाठ, पोलीस नाइक सारंग वाघ, पोलीस शिपाई गजानन पवार, सूरज गवळी आणि संतोष वाघ यांच्या पथकाने ही कारवाई केली आहे.

नाशिक : थंडीचा जोर वाढत असून मुंबईसह, ठाणे, पालघर भागामध्ये येत्या रविवारी (दि. २२) तुरळक पावसाची शक्यता वर्तवण्यात आली आहे. तर २३ डिसेंबर पर्यत ढगाळ वातावरणाची शक्यता असल्याचा अंदाजही वर्तवण्यात आला आहे.

दरम्यान हवामान बदलांमुळे तुरळक सरी बरसणार असल्याचे स्कायमेट या खाजगी वेधशाळेने सांगितले आहे. त्यामुळे येत्या २२ व २३ डिसेंबर रोजी मुंबईसह नजीकच्या शहरांमध्ये पावसाचा अंदाज वर्तविला आहे.

२०१९ या वर्षात पाऊसाने जोरदार धुमाकूळ घातल्याने अनेक ठिकणी पिकांचे नुकसान झाले. त्यानंतर दिवसेंदिवस हवामान बदलत आहे. नाशिकमध्ये तापमानाचा पारा पुन्हा घसरला असून तापमानाचा पारा १३ अशांवर स्थिरावला आहे. दरम्यान अरबी समुद्रामध्ये कमी दाबाचा पट्टा निर्माण झाल्याने पावसाची शक्यता असल्याचा अंदाज स्कायमेट या खाजगी हवामान अंदाज व्यक्त करणाऱ्या वेधशाळेने म्हटले आहे.