चेन्नई । Chennai
तमिळनाडूच्या नुकत्याच झालेल्या विधानसभा निवडणुकीच्या निकालांनंतर राजकीय वर्तुळात अनेक तर्क-वितर्कांना उधाण आले होते. त्यातच दाक्षिणात्य चित्रपटसृष्टीचे ‘थलायवा’ म्हणजेच सुपरस्टार रजनीकांत यांच्या प्रदीर्घ शांततेमुळे अनेक अफवा आणि चर्चांना पेव फुटले होते.
काहींनी ते निवडणूक निकालांवर नाराज असल्याचा दावा केला, तर काहींनी त्यांच्या पक्षाच्या विलीनीकरणाच्या वावड्या उठवल्या. मात्र, अखेर या सर्व चर्चांना आणि अफवांना पूर्णविराम देत सुपरस्टार रजनीकांत यांनी आपले मौन सोडले आहे. “मी गप्प राहिलो असतो तर खोट्यालाच सत्य मानलं गेलं असतं,” अशा कडक शब्दांत त्यांनी तमिळनाडूच्या राजकीय घडामोडींवर आपली स्पष्ट भूमिका मांडली आहे.
रजनीकांत यांनी चेन्नईतील आपल्या प्रसिद्ध पोएस गार्डन निवासस्थानी एका विशेष पत्रकार परिषदेचे आयोजन केले होते. निवडणुकीचे निकाल जाहीर झाल्यापासून रजनीकांत यांच्या भूमिकेकडे संपूर्ण देशाचे लक्ष लागले होते. विशेषतः अभिनेता विजय याच्या ‘तमिळनाडू वेत्री कळघम’ (TVK) पक्षाला मिळालेल्या अभूतपूर्व आणि ऐतिहासिक यशानंतर रजनीकांत काय बोलणार, याकडे सर्वांचे डोळे लागले होते. पत्रकार परिषदेत बोलताना त्यांनी सर्व उलट-सुलट चर्चा फेटाळून लावल्या आणि विरोधकांना चोख उत्तर दिले.
निवडणुकीचे निकाल समोर आल्यानंतर रजनीकांत यांनी थेट मुख्यमंत्री एम. के. स्टॅलिन यांची भेट घेतली होती. या भेटीनंतर सोशल मीडिया आणि राजकीय वर्तुळात रजनीकांत यांच्यावर मोठ्या प्रमाणात टीका करण्यात आली. या टीकेला उत्तर देताना रजनीकांत म्हणाले, “मुख्यमंत्री एम. के. स्टॅलिन आणि माझी मैत्री ही राजकारणाच्या पलीकडची आहे. आमच्यात वैयक्तिक ऋणानुबंध आहेत. मात्र, कुलाथूर मतदारसंघातील पराभवामुळे मला वैयक्तिक पातळीवर नक्कीच दुःख झाले आहे. मी कोणत्याही गोष्टीचे विनाकारण राजकारण करणारा माणूस नाही.”
तमिळनाडूच्या राजकारणात नवे वादळ निर्माण करणाऱ्या अभिनेता विजय याच्या यशाबद्दल बोलताना रजनीकांत यांच्या चेहऱ्यावर एक ज्येष्ठ मार्गदर्शक म्हणून समाधान दिसत होते. ते म्हणाले, “विजय राज्याचा मुख्यमंत्री झाला हे ऐकून मलाही कमालीचे आश्चर्य वाटले. माझ्या आणि विजयच्या वयात तब्बल २८ वर्षांचे अंतर आहे. मात्र, तमिळनाडूतील दोन बलाढ्य आणि पारंपरिक राजकीय पक्षांविरोधात स्वतःच्या बळावर आणि कौशल्यावर एवढा मोठा विजय मिळवणे, ही अत्यंत कौतुकास्पद आणि मोठी गोष्ट आहे.”
दुसरीकडे, तमिळनाडूच्या राजकारणात अभिनेता विजय याच्या ‘तमिळनाडू वेत्री कळघम’ (TVK) पक्षाने विधानसभेत १०८ जागांवर विजय मिळवून सत्ता स्थापन केली आहे. नुकत्याच झालेल्या अत्यंत महत्त्वाच्या विश्वासदर्शक ठरावातही विजय यांच्या सरकारने बाजी मारली आहे. त्यांना तब्बल १४४ आमदारांनी पाठिंबा दर्शवत मतदान केले. त्यामुळे विजय यांच्या मुख्यमंत्रीपदाला आता कोणताही धोका नसून त्यांचे सरकार स्थिर असल्याचे स्पष्ट झाले आहे. रजनीकांत यांच्या या रोखठोक पत्रकार परिषदेनंतर तमिळनाडूच्या राजकारणाला आता एक नवी दिशा मिळाली आहे. थलायवांच्या या भूमिकेमुळे मुख्यमंत्री विजय यांच्या राजकीय प्रवासाला आणि यशाला एक नवा आयाम तसेच मोठी ताकद मिळाल्याचे बोलले जात आहे.
