सांगली । Sangali
सांगली जिल्हा परिषदेच्या अध्यक्ष आणि उपाध्यक्षपदाच्या अत्यंत चुरशीच्या निवडणुकीत महाविकास आघाडीने बाजी मारली आहे. राष्ट्रवादी काँग्रेस (शरदचंद्र पवार) पक्षाच्या संगीता पाटील यांची अध्यक्षपदी निवड झाली असून, त्यांनी भाजपच्या उमेदवार स्वप्नाली मिसाळ यांचा पराभव केला. या निकालामुळे जिल्ह्यातील राजकीय समीकरणे बदलली असून सत्ताधारी महायुतीला मोठा धक्का बसल्याचे मानले जात आहे. निवडणुकीच्या अखेरच्या क्षणापर्यंत कायम असलेला सस्पेन्स संपवत महाविकास आघाडीने ‘करेक्ट कार्यक्रम’ केल्याची चर्चा आता संपूर्ण जिल्ह्यात रंगली आहे.
गुरुवारी पार पडलेल्या या निवडणूक प्रक्रियेत राष्ट्रवादीच्या संगीता पाटील यांना ३४ मते मिळाली, तर भाजपच्या स्वप्नाली मिसाळ यांना केवळ २५ मतांवर समाधान मानावे लागले. निवडणूक निर्णय अधिकारी म्हणून उत्तम दिघे यांनी या प्रक्रियेचे कामकाज पाहिले. या विजयानंतर महाविकास आघाडीच्या कार्यकर्त्यांनी जिल्हा परिषद परिसरात मोठा जल्लोष केला. भाजपला रोखण्यासाठी महाविकास आघाडीने आखलेली रणनीती यशस्वी ठरल्याचे या निकालावरून स्पष्ट झाले आहे.
अध्यक्षपदासोबतच उपाध्यक्षपदी काँग्रेसचे ज्येष्ठ नेते आणि आमदार विश्वजीत कदम यांचे भाचे ऋषिकेश लाड यांची निवड करण्यात आली आहे. लाड यांची निवड जाहीर होताच कदम कुटुंबीय आणि समर्थकांमध्ये आनंदाचे वातावरण पसरले. विशेष म्हणजे, ऋषिकेश लाड यांच्या निवडीचा आनंद त्यांचे वडील आणि मामा विश्वजीत कदम यांनी टाळ्या आणि शिट्ट्या वाजवून व्यक्त केला. या निवडीमुळे जिल्हा परिषदेत राष्ट्रवादी (शरद पवार गट) आणि काँग्रेसची युती अधिक भक्कम झाल्याचे दिसून येत आहे.
या निवडणुकीतील सर्वात महत्त्वाची बाब म्हणजे महायुतीमधील अंतर्गत फूट उघड झाली आहे. अजित पवार यांच्या राष्ट्रवादी काँग्रेसच्या दोन सदस्यांनी भाजप उमेदवार स्वप्नाली मिसाळ यांना मतदान केले. मात्र, दुसरीकडे मुख्यमंत्री एकनाथ शिंदे यांच्या नेतृत्वाखालील शिवसेनेच्या दोन सदस्यांनी मतदानावेळी सभागृहात येण्याचे टाळले. या गैरहजेरीमुळे महाविकास आघाडीचे पारडे जड झाले आणि प्रत्यक्ष-अप्रत्यक्षपणे शिंदे गटाच्या सदस्यांनी आघाडीला मदत केल्याची चर्चा आता राजकीय वर्तुळात सुरू झाली आहे.
सांगली जिल्हा परिषदेत कोणत्याही एका पक्षाला स्पष्ट बहुमत नव्हते, त्यामुळे अपक्ष आणि लहान पक्षांची भूमिका निर्णायक होती. जिल्हा परिषदेच्या एकूण बलाबलानुसार, शरद पवार यांच्या राष्ट्रवादीकडे सर्वाधिक १८ जागा होत्या. त्याखालोखाल भाजप १६, काँग्रेस ११, शिंदे शिवसेना ७, तर अजित पवार यांच्या राष्ट्रवादीकडे ६ जागा होत्या. जनसुराज्य, शिवसेना (ठाकरे गट) आणि रयत क्रांती संघटनेकडे प्रत्येकी १ जागा होती. या सर्व आकडेवारीचा मेळ घालत महाविकास आघाडीने अपक्ष आणि मित्रपक्षांच्या मदतीने बहुमताचा ३१ हा आकडा पार करत सत्ता काबीज केली आहे.
