दिंडोरी | प्रतिनिधी Dindori
दिंडोरी येथे विहिरीत पडून मृत्युमुखी पडलेल्या नऊ जणांच्या दरगोडे कुटुंबीयांच्या नातेवाईकांना आज शिवसेनेचे नवनिर्वाचित दिंडोरी लोकसभा संपर्कप्रमुख भाऊसाहेब चौधरी यांनी भेट दिली व सांत्वन केले. शासन दरगोडे कुटुंबीयांच्या पाठीशी आहे असे आश्वासन संपर्कप्रमुख भाऊसाहेब चौधरी यांनी दिले.
दिंडोरी लोकसभा मतदारसंघाचे संपर्कप्रमुख म्हणून भाऊसाहेब चौधरी यांनी नुकतीच सूत्रे हाती घेतली व त्यानंतर तात्काळ त्यांनी दिंडोरी येथे दौरा केला. दिंडोरी येथील दौर्‍यात इंदोरे येथे जाऊन दरगोडे कुटुंबियांची त्यांनी भेट घेतली अपघात कसा झाला ? व त्यानंतर काय काय कार्यवाही झाली? त्याची माहिती घेतली. कुटुंबाला आधार दिला.
आई-वडिलांचे दुःख हलके करण्याचा प्रयत्न केला. शासनाची जाहीर केलेली मदत मिळाली किंवा नाही याची माहिती घेतली. कोणतेही अडचण आल्यास भेट घ्यावी असे आवाहन भाऊसाहेब चौधरी यांनी केले. यावेळी त्यांच्या समवेत माजी आमदार धनराज महाले, सहसंपर्कप्रमुख सुनील पाटील, जिल्हाप्रमुख भाऊराव तांबडे, नगरसेवक सुजित मुरकुटे आदी शिवसैनिक उपस्थित होते.
