पुणे | Pune
राज्यातील गाळप हंगाम 15 ऑक्टोबरपासून सुरू करण्यास मंत्रिसमितीने नुकतीच मान्यता दिली आहे. साखर आयुक्तालयाकडून मिळालेल्या माहितीनुसार, राज्यातील आगामी ऊस गाळप हंगामासाठी आतापर्यंत 127 साखर कारखान्यांनी गाळप परवान्यासाठी ऑनलाईन अर्ज दाखल केले आहेत. सर्वाधिक अर्ज कोल्हापूर आणि सोलापूर विभागांतून प्रत्येकी 24, अहिल्यानगर विभागातून 22 आणि पुणे विभागातून 21 दाखल झाले आहेत.
नांदेड विभागातून 18, छत्रपती संभाजीनगर विभागातून 16, अमरावती विभागातून एक आणि नागपूर विभागातून एक अर्ज दाखल झाला आहे. 66 सहकारी आणि 61 खासगी कारखान्यांचा यात समावेश आहे. गाळप परवान्याची प्रक्रिया सुरू असून, काही कारखान्यांचे अर्ज प्रादेशिक सहसंचालकांकडे प्रलंबित आहेत. अहिल्यानगर, छत्रपती संभाजीनगर, नांदेड आणि पुणे विभागांतील काही अर्जाची छाननी सुरू आहे. यंदाच्या हंगामासाठी राज्यात सुमारे 15.48 लाख हेक्टर क्षेत्रावरील ऊस गाळपासाठी उपलब्ध असल्याचा प्राथमिक अंदाज आहे. मात्र अपुरा पाऊस आणि काही भागांतील पाणीटंचाईमुळे प्रत्यक्ष ऊस उपलब्धतेवर परिणाम होण्याची शक्यता आहे. मागील हंगामात पुणे आणि सोलापूर विभागांनी ऊस गाळपात आघाडी घेतली होती.
कोल्हापूर विभागाची साखर उतारा आणि उत्पादनातील कामगिरीही चांगली राहिली होती. पश्चिम महाराष्ट्रातील पुणे, कोल्हापूर आणि सोलापूर विभागांत ऊस क्षेत्र व साखर कारखान्यांची संख्या मोठी आहे. त्यामुळे यंदाच्या गाळप हंगामातही या विभागांचे महत्त्व कायम राहण्याची शक्यता आहे. विविध विभागांतील अर्जाची वर्गवारी आयुक्तालयाच्या नोंदीनुसार करण्यात आली आहे.
