अहिल्यानगर |प्रतिनिधी| Ahilyanagar
दारू पिण्यासाठी पैसे दिले नाही म्हणून महिलेला लाकडी दांडक्याने मारहाण करून डोक्यात दगड मारून जखमी केले. सुरेखा भापकर काळे (वय 45 रा. साईनगर, भोसले आखाडा, बुरूडगाव रस्ता) असे जखमी महिलेचे नाव आहे. त्यांनी दिलेल्या फिर्यादीवरून कोतवाली पोलीस ठाण्यात दोघांविरूध्द गुन्हा दाखल करण्यात आला आहे.
प्रवीण भापकर काळे (रा. साईनगर, भोसले आखाडा, बुरूडगाव रस्ता), व दीपक पुष्ट्या चव्हाण (रा. देवी मंदिरा जवळ, केडगाव) अशी गुन्हा दाखल झालेल्या संशयित आरोपींची नावे आहेत. शनिवारी (5 ऑक्टोबर) सायंकाळी साडेसातच्या सुमारास सुरेखा त्यांच्या घरी असताना प्रवीण व दीपक तेथे आले. प्रवीणने सुरेखाकडे दारू पिण्यासाठी पैसे मागितले असता त्यास सुरेखा यांनी नकार दिला. प्रवीणला राग आल्याने त्याने दगड उचलून सुरेखाच्या डोक्यात मारून जखमी केले.
त्यावेळी सुरेखाचे पती मध्ये गेले असता दीपकने त्यांना काठीने मारहाण केली. दोघांनी शिवीगाळ, दमदाटी केली असल्याचे फिर्यादीत म्हटले आहे. जखमी सुरेखा यांनी रुग्णालयात उपचार घेतल्यानंतर रविवारी (6 ऑक्टोबर) रात्री कोतवाली पोलीस ठाण्यात फिर्याद दिली.
