महिला टी-20 विश्वचषक २०२६ मध्ये भारताने कट्टर प्रतिस्पर्धी पाकिस्तानवर ६४ धावांनी शानदार विजय मिळवत स्पर्धेतील मोहिमेची दमदार सुरुवात केली. बर्मिंगहॅमच्या एजबेस्टन मैदानावर झालेल्या या हायव्होल्टेज सामन्यात भारतीय संघाने फलंदाजी, गोलंदाजी आणि क्षेत्ररक्षण या तिन्ही विभागांत वर्चस्व गाजवत पाकिस्तानला चारही मुंड्या चित केले.
प्रथम फलंदाजी करताना भारताची सुरुवात काहीशी अडखळती झाली. शेफाली वर्मा आणि जेमिमा रॉड्रिग्ज यांच्या विकेट्स लवकर गमावल्यानंतर सलामीवीर स्मृती मंधाना आणि कर्णधार हरमनप्रीत कौर यांनी डाव सावरला. मंधानाने अवघ्या ४४ चेंडूंत ६८ धावांची खेळी करत भारताच्या डावाचा भक्कम पाया रचला. तिने आपल्या खेळीत आकर्षक चौकार आणि षटकारांची आतषबाजी केली. हरमनप्रीतने ३६ धावांचे महत्त्वपूर्ण योगदान दिले, तर रिचा घोषने शेवटच्या षटकांत केवळ १७ चेंडूंत ३४ धावांची स्फोटक खेळी करून भारताला २० षटकांत ६ बाद १७० धावांपर्यंत पोहोचवले.
१७१ धावांच्या आव्हानाचा पाठलाग करताना पाकिस्तानने सुरुवातीला दमदार खेळ केला. पॉवरप्लेमध्ये पाकिस्तानने भारताविरुद्धची महिला टी-20 विश्वचषकातील सर्वोत्तम सुरुवात नोंदवली. मुनीबा अलीने ४१ धावांची लढाऊ खेळी करत भारताच्या गोलंदाजांना चांगलाच प्रतिकार केला.
मात्र, मधल्या षटकांत भारतीय गोलंदाजांनी सामन्याचे चित्रच पालटले. दीप्ती शर्माने अचूक मारा करत पाकिस्तानच्या फलंदाजांवर अंकुश ठेवला, तर युवा फिरकीपटू श्री चरणीने तीन महत्त्वपूर्ण विकेट्स घेत पाकिस्तानचा डाव विस्कळीत केला. मुनीबा अली धावबाद झाल्यानंतर पाकिस्तानचा डाव पूर्णपणे कोसळला आणि नियमित अंतराने विकेट्स पडत गेल्या. भारतीय क्षेत्ररक्षकांनीही चपळ क्षेत्ररक्षण करत पाकिस्तानवर दबाव कायम ठेवला.
पाकिस्तानचा संपूर्ण डाव निर्धारित २० षटकांत १०६ धावांवर आटोपला आणि भारताने हा सामना ६४ धावांच्या मोठ्या फरकाने जिंकला. या विजयामुळे भारताने गट टप्प्यात महत्त्वाचे दोन गुण मिळवले असून उपांत्य फेरीच्या दिशेने भक्कम पाऊल टाकले आहे.
